مەملەكەتتىك تۋدى بالكوندارعا ىلۋگە رۇقسات ەتىلمەك
اشىق تالقىعا شىعارىلعان ۇكىمەت قاۋلىسىنا ساي، ەندى تۋدى بالكوندارعا ىلۋگە رۇقسات ەتىلەدى، دەپ حابارلايدى قازاقپارات ءتىلشىسى.
«جەكە تۇلعالارعا تيەسىلى عيماراتتاردا، ءۇي-جايلاردا (ءۇي-جايلاردىڭ بولىگىندە، بالكونداردا) مەملەكەتتىك تۋ كولبەۋ تۇردە (45 گرادۋستان اسپايتىن بولۋى ءتيىس)، 3 مەتردەن تومەن ەمەس بيىكتىكتە ورنالاستىرۋعا رۇقسات ەتىلەدى. مەملەكەتتىك تۋ 1x2 مەتر ولشەمدە بولۋى ءتيىس»، - دەلىنگەن اشىق ن ق ا پورتالىندا جاريالانعان ۇكىمەت قاۋلىسىنىڭ جوباسىندا.
ايتا كەتەيىك، قولدانىستاعى زاڭناما تالابىندا مۇنداي نورما جوق. سونىمەن قاتار قاۋلىعا تاعى بىرنەشە وزگەرىس ەنگىزىلمەك. اتاپ ايتقاندا، ەندى مەملەكەتتىك تۋدىڭ بەينەسى اسكەري نەمەسە وزگە دە مەملەكەتتىك قىزمەت اتقاراتىن ادامدار ءۇشىن بەلگىلەنگەن ايىرىم بەلگىلەرى مەن نىساندى كيىم ۇلگىلەرىندە، مەملەكەتتىك ناگرادالاردىڭ ەلەمەنتى، گەرالديكالىق نەگىزى رەتىندە، سونداي-اق سپورتشىلاردىڭ سپورتتىق كوستيۋمدەرى مەن باسقا دا سپورتتىق كەرەك-جاراقتارىنا پايدالانۋى مۇمكىن. دەگەنمەن بۇل رەتتە مىناعان تىيىم سالىنادى:
- ق ر مەملەكەتتىك تۋىن قوعامدىق بىرلەستىكتەر مەن باسقا دا ۇيىمدار جالاۋلارى، مورلەرى جانە تاڭبالارىنىڭ گەرالديكالىق نەگىزى رەتىندە پايدالانۋعا بولمايدى.
بۇعان قوسا قاۋلىنىڭ جاڭا تارماعىنا سايكەس، مىنا ارەكەتتەر تۋدى قورلاۋ بولىپ سانالادى:
- جىرتۋ، جاعۋ، ورتەۋ، قاساقانا جەرگە تاستاۋ، تاپتاۋ، قوقىسقا لاقتىرۋ؛
- كوللاج جاساۋ ارقىلى مەملەكەتتىك تۋدى قورلاۋ، تىيىم سالىنعان جانە ماقساتقا ساي ەمەس جەرلەردە پايدالانۋ، الەۋمەتتىك جەلىلەردى قوسا العاندا مەملەكەتتىك تۋدى كوپشىلىك الدىندا مازاق ەتۋ، بالاعاتتاۋ.
قاۋلى27- قىركۇيەككە دەيىن كوپشىلىك تالقىلاۋدا بولادى.
