جەر قويناۋىنان تۇسكەن ءونىمدى ءبولۋ كەلىسىمدەرىن قايتا قاراۋ ءۇشىن كەلىسسوز باستاۋ كەرەك - مينيسترلىك

استانا. قازاقپارات - ەنەرگەتيكا ۆيتسە- ءمينيسترى اسحات حاسەنوۆ ءونىمدى ءبولۋ تۋرالى كەلىسىمدەردى (ءو ب ك) قايتا قاراۋ ماسەلەسىنە قاتىستى تۇسىنىك بەردى، دەپ حابارلايدى قازاقپارات ءتىلشىسى.

«ءونىمدى ءبولۋ تۋرالى كەلىسىمدەردى قايتا قاراۋ ءۇشىن كەلىسسوز باستاۋ كەرەك. بۇل تۇرعىدا ناقتى نەنى قايتا قاراعىمىز كەلەتىنىن انىقتاپ الۋىمىز شارت. ەگەر ءبىز وسى باستامانى كوتەرىپ، ناقتى ءبىر كورسەتكىشتەردى ارتتىرۋ نەمەسە ازايتۋ تۇرعىسىنان تالابىمىز بولسا، وندا كەلىسسوز ارقىلى شەشىلەدى. اتاپ ايتقاندا، وسى كەلىسسوز پروتسەسى قوس تاراپ ءوزارا كەلىسىمگە كەلگەننەن كەيىن اياقتالادى. ياعني وسى راسىمدەر ەسكەرىلمەسە، سوت تالقىلاۋى سياقتى ماسەلە بولۋى مۇمكىن»، - دەدى ا. حاسەنوۆ ءماجىلىستىڭ جالپى وتىرىسىنان كەيىن تىلشىلەر سۇراعىنا جاۋاپ بەرە وتىرىپ.

ۆيتسە- ءمينيستردىڭ ايتۋىنشا، قازىرگى كەزدە ۇكىمەت وسى باعىتتا ءبىر كەلىسىمدى سوت ارقىلى شەشۋ باستاماسىن كوتەرگەن.

«ەگەر بۇل ماسەلەدە ءوزارا كەلىسە الماساق، وندا اربيتراجعا جۇگىنەمىز. ال قوس تاراپ ءوزارا كەلىسىمگە كەلگەن جاعدايدا بارلىق پروبلەما جەڭىل شەشىلەدى» ، - دەدى اسحات حاسەنوۆ.

بۇدان بۇرىن حابارلانعانداي، بۇگىن ءماجىلىس دەپۋتاتى، «اق جول» فراكتسياسىنىڭ جەتەكشىسى ازات پەرۋاشيەۆ ستراتەگيالىق كەن ورىندارىنداعى قازاقستان ۇلەسىن %51 دان از بولماۋ تالابىن زاڭمەن بەلگىلەۋدى ۇسىندى.

«ەڭ الدىمەن ءونىمدى ءبولۋ تۋرالى كەلىسىمدەردىڭ (ءو ب ك) شارتتارىن جاريالاۋ كەرەك. سوڭعى ۋاقىتتا بۇقارالىق اقپارات قۇرالدارىندا وبك- دا كوڭىل كونشىتپەيتىن شارتتار بار دەگەن اقپارات جاريالانعان. سوعان سايكەس، قازاقستان قاشاعان سياقتى ءىرى كەن ورنىنان وندىرىلەتىن مۇنايدان ماردىمسىز ۇلەس الىپ وتىر»، - دەدى ا. پەرۋاشيەۆ.