مەكتەپتەگى الىمجەتتىكپەن كۇرەس - دەپۋتاتتار ءوز ۇسىنىستارىن جاريالادى

استانا. قازاقپارات - ءماجىلىس دەپۋتاتى اسحات ايماعامبەتوۆ مەكتەپتەردەگى بۋللينگپەن كۇرەسكە قاتىستى ۇسىنىسىن ايتتى، دەپ حابارلايدى قازاقپارات ءتىلشىسى.

دەپۋتات ەلىمىزدە بۋللينگ پەن بالالار قۇقىعىن قورعاۋ كەشەندى پروبلەما ەكەنىن ايتا كەلە:

ءبىراز جىلدار بويى مەكتەپتەرگە پسيحولوگتەردىڭ جەتكىلىكتى سانىن الۋ ماسەلەسىن كوتەرىپ كەلەمىز. كەيبىر ارىپتەستەر بالالار پسيحولوگكە بارمايدى دەگەن ءۋاج ايتىپ جاتىر. دەگەنمەن، بۇل سىلتاۋ شىندىققا جاناسپايدى. قازىر بالالاردىڭ تانىم- تۇسىنىگى مۇلدەم باسقا، ولار پسيحولوگكە بارۋدى دۇرىس قابىلداپ وتىر جانە بۇل كومەكتى قاجەت ەتەدى. اقپاراتتىڭ كوپتىگىنە بايلانىستى قازىر بالالاردا بەلگىلى ءبىر پروبلەما بار ەكەنى بايقالىپ وتىر، - دەدى ا. ايماعامبەتوۆ ءماجىلىستىڭ جالپى وتىرىسىنان كەيىن تىلشىلەر سۇراعىنا جاۋاپ بەرە وتىرىپ.

ونىڭ پايىمىنشا، قازاقستاندا پسيحولوگيالىق قىزمەتتى كۇشەيتۋ قاجەت. قازىر ءبىر پسيحولوگكە شاققاندا 1000-1500 بالادان كەلەدى. سوندىقتان، مۇنداي جۇكتەمەنى ەڭسەرۋ مۇمكىن ەمەس. بۇل رەتتە دەپۋتاتتار ۇكىمەت الدىنا قوسىمشا پسيحولوگ كادرلارىن تارتۋ، ولاردى دايارلاۋ جۇيەسىن جەتىلدىرۋ ماسەلەسىن كوتەرىپ وتىر.

سونداي- اق، قۇمار ويىندارعا تاۋەلدىلىك، بالالاردىڭ قۇقىقتارى ماسەلەسىن شەشۋگە ارنالعان زاڭ جوباسى دايىندالىپ جاتىر.

بىزدە كەيبىر بالالار ۇيىرمەلەرگە بارمايدى، سپورت سەكتسيالارىمەن قامتىلماعان. كەيبىر اتا- انالار بالاسىن بەس- التى سەكتسياعا جازىپ قويادى. سونىمەن قاتار، كۇنى- ءتۇنى جۇمىستا جۇرگەن اتا- انالار بالاسىن سەكتسيالار مەن ۇيىرمەلەرگە تىركەي الاتىنىن دا بىلمەيدى. سوندىقتان، ءبىز زاڭناماعا ءتيىستى تۇزەتۋدى ەنگىزدىك. ونىڭ اياسىندا ۇيىندە بوس جۇرگەن بالالاردىڭ ۇيىرمەلەرگە مىندەتتى تۇردە بارۋىن قامتاماسىز ەتەتىن قادامدار ەسكەرىلگەن. مۇنداي باتىل ارەكەتتەر جاساۋ كەرەك، سەبەبى بۇل بالالار ۇيىرمەلەرگە مۇلدەم بارماۋى مۇمكىن. سونىمەن قاتار، قيىن جاعدايعا تاپ بولعان جەتكىنشەكتەر مەن جاسوسپىرىمدەرگە پسيحولوگتەر كومەكتەسۋى ءتيىس، - دەدى دەپۋتات.

بۇدان بۇرىن حابارلانعانداي، ەلىمىزدە ءبىلىم بەرۋ ۇيىمدارىنداعى بۋللينگكە قارسى ءبىرىڭعاي باعدارلاما ازىرلەنىپ جاتىر.