قازاقستاندا كولىك سالىعى كىمدەر ءۇشىن جەڭىلدەتىلەدى؟

استانا. قازاقپارات - قازاقستانداعى كولىك سالىعى بەنزيننىڭ اكتسيز قۇنىنا قوسۋ ارقىلى جويىلۋى مۇمكىن.

بۇل تۋرالى ۇلتتىق ەكونوميكا ۆيتسە-ءمينيسترى ازامات ءامىرين ايتتى.

ۆيتسە-ءمينيستردىڭ ايتۋىنشا، بۇل ماسەلە بۇگىن جاڭا سالىق كودەكسىن قاراۋ اياسىندا تالقىلانىپ جاتىر.

«شىنىندا دا، كولىك سالىعىن بەنزيننىڭ اكتسيز قۇنىنا اۋىستىرۋ مۇمكىندىگى تالقىلانىپ جاتىر. ءبىراق مۇندا مۇقيات بولۋ كەرەك، سوندىقتان ءبىز ونى سارالايمىز. قوزعالتقىشىنىڭ كولەمى ءتورت ليترگە دەيىن نەمەسە 3,5 كە دەيىنگى اۆتوكولىكتەر ءۇشىن كولىك سالىعىن الىپ تاستاۋ تالقىعا سالىندى. قازىر قوسىمشا ەسەپتەۋ جۇرگىزىپ جاتىرمىز. ءبىز شامامەن 80 ميلليارد تەڭگە كولىك سالىعىن، شامامەن 5 ميلليون توننا مۇناي ونىمدەرىن جينايمىز. ەگەر بىرەۋىن ەكىنشىسىنە بولسەك، كولىك سالىعىن بەنزين اكتسيزىنە كوشىرسەك، بۇل سالىقتى الۋ ءۇشىن اكتسيز 14 تەڭگەگە قىمباتتاۋى كەرەك»، - دەدى ءامىرين.

سونىمەن قاتار، ۆيتسە-ءمينيستردىڭ سوزىنشە، مۇنداي قادام ارقىلى قوزعالتقىشى ۇلكەن كولىك قۇرالدارىنىڭ يەلەرىنە جۇكتەمە ازايىپ، كەرىسىنشە شاعىن كولەمدى كولىكتەردىڭ يەلەرى ءۇشىن كوبەيەدى. وسىعان بايلانىستى باسقا نۇسقالار دا تالقىلانادى.

«مىسالى، قوزعالتقىش كولەمى 1,6 ليتر بولاتىن كولىكتى الايىق - شاعىن Hyundai Accent - جىلدىق سالىعى شامامەن 7 مىڭ تەڭگە، ال كولىك سالىعى شامامەن 700 مىڭ تەڭگە بولاتىن Lexus 570 الايىق. تيىسىنشە، شاعىن كولىك سالىقتى وتەۋ ءۇشىن بەنزيندى كوپ تۇتىنۋى كەرەك. ەگەر ءبىز بەنزيننىڭ قۇنىن 14 تەڭگەگە كوتەرسەك، وندا كولىك سالىعىنا ءبىر جىلدا 30 مىڭ تەڭگە تولەيدى. ال قوزعالتقىشى ۇلكەن كولىكتىڭ سالىعى بەنزين ارقىلى شامامەن 300-350 مىڭعا جەتەدى. سوندىقتان، بەنزينگە كولىك سالىعىن اۋدارۋ ارقىلى ءبىز ۇلكەن كولىكتەرى بار ادامدارعا جۇكتەمەنى ازايتامىز»، - دەدى شەنەۋنىك.

Massaget.kz