ا ق ش پرەزيدەنتى دجو بايدەنگە يمپيچمەنت جاريالانۋى مۇمكىن
وكىلدەر پالاتاسىنىڭ سپيكەرى كيەۆين ماككارتي تەرگەۋ «بيلىگىن اسىرا پايدالانۋ، ادىلدىككە كەدەرگى كەلتىرۋ جانە جەمقورلىق» سىندى ايىپتاۋلاردى نەگىزگە الاتىنىن مالىمدەدى.
رەسپۋبليكاشىلار قاڭتاردا وكىلدەر پالاتاسىندا باسىمدىققا يە بولعاننان باستاپ-اق قازىرگى پرەزيدەنتكە قاتىستى تەرگەۋ جۇرگىزىپ جاتىر.
بۇعان دەيىنگى تىڭدالىمدار بايدەننىڭ قۇقىققا قارسى ىسىنە ناقتى دالەل تاپپادى. دەگەنمەن، وسى وتىرىستار بارىسىندا پرەزيدەنتتىڭ ۇلى حانتەر بايدەننىڭ ىسكەرلىك بايلانىستارىنا (رەسپۋبليكاشىلاردىڭ پىكىرىنشە، «كۇمان تۋدىراتىن بايلانىستار») قاتىستى ءبىرقاتار ماسەلە اشىلدى، سونداي-اق ۇلى وسى ءىس-ارەكەتتەرى جايىندا دجو بايدەننىڭ حاباردار ەكەنى انىقتالدى.
ماككارتي پرەزيدەنتتىڭ قۇقىققا قايشى ارەكەتتەرىن تەرگەپ جاتقان رەسمي تۇلعالار بايدەننىڭ وتباسىنا ەرەكشە نازار اۋدارعانىن مالىمدەدى.
اق ءۇي ماككارتي شەشىمىن بىردەن سىنعا الدى:
«وكىلدەر پالاتاسىنداعى رەسپۋبليكاشىلار پرەزيدەنتكە قاتىستى توعىز ايدان بەرى تەرگەۋ جۇرگىزىپ جاتىر، ءبىراق قۇقىق بۇزۋعا قاتىستى ەشقانداي دالەل تاپپادى»، - دەپ جازدى اق ءۇي وكىلى يان سەمس الەۋمەتتىك جەلىدە.
«ەكسترەمال ساياساتتىڭ ەڭ ناشار كورىنىسى»، - دەپ سيپاتتادى ول وسى جاعدايدى.
قازىرگى ۋاقىتتا حانتەر بايدەنگە قاتىستى شەتەلدەگى ىسكەرلىك مۇددەسىنە بايلانىستى سالىقتان جالتارۋ قىلمىستارى جونىندە فەدەرالدىق تەرگەۋ ءجۇرىپ جاتىر.
اق ءۇي حانتەر بايدەن ىسىنە ءوزىنىڭ قاتىسىن جوققا شىعارىپ وتىر جانە ۇلى بيزنەسىنە پرەزيدەنتتىڭ ەش قاتىسى جوق ەكەنىن مالىمدەدى.
ا ق ش كونستيتۋتسياسى بويىنشا، پرەزيدەنت «وپاسىزدىق، جەمقورلىق پەن باسقا دا اۋىر قىلمىس پەن ىستەرى» ءۇشىن جاۋاپقا تارتىلىپ، قىزمەتىنەن كەتۋى مۇمكىن.
دەگەنمەن، پرەزيدەنت بايدەندى ورنىنان الىپ تاستاۋ جونىندەگى امالدىڭ ءبارى ءساتسىز بولادى، دەپ جازادى BBC News.
رەسپۋبليكاشىلاردىڭ باقىلاۋىنداعى وكىلدەر پالاتاسى بايدەندى ورنىنان تايدىرۋ قاجەت دەپ داۋىس بەرگەننىڭ وزىندە، سەنات ونى ماقۇلداماۋى مۇمكىن، سەبەبى ول جاقتا دەموكراتتار باسىم داۋىسقا يە.
ترامپ - ەكى رەت يمپيچمەنت جاريالانىپ، ەكەۋىندە دە رەسپۋبليكاشىل-ارىپتەستەرى اقتاپ العان ا ق ش- تىڭ جالعىز پرەزيدەنتى.
