ازىق-تۇلىك باعاسىن تۇراقتاندىرۋ بويىنشا جۇمىستى جالعاستىرۋ قاجەت - سمايىلوۆ

استانا. قازاقپارات - ازىق-تۇلىك تاۋارلارىنىڭ باعاسىن تۇراقتاندىرۋ جانە تاماق ءوندىرىسىن ىنتالاندىرۋ بويىنشا بەلسەندى جۇمىستى جالعاستىرۋ قاجەت.

بۇل تۋرالى ۇكىمەت وتىرىسىندا پرەمەر-مينيستر ءاليحان سمايىلوۆ ايتتى، دەپ حابارلايدى قازاقپارات ءتىلشىسى.

«8 ايدىڭ قورىتىندىسى بويىنشا باتىس قازاقستان، قوستاناي، قىزىلوردا، سولتۇستىك قازاقستان وبلىستارىندا، الماتى جانە شىمكەنت قالالارىندا بارلىق نەگىزگى كورسەتكىشتەردىڭ ءوسىمى تىركەلدى. قالعان وڭىرلەر نىسانالى كورسەتكىشتەردىڭ ورىندالۋىن قامتاماسىز ەتۋى ءتيىس. قابىلدانعان شارالاردىڭ ارقاسىندا تامىز ايىنىڭ قورىتىندىسى بويىنشا ينفلياتسيا 13,1 پايىزعا دەيىن تومەندەدى»، - دەدى ۇكىمەت باسشىسى.

پرەمەر-مينيستر مەملەكەتتىك ورگاندار مەن ءوڭىر اكىمدىكتەرى ازىق-تۇلىك تاۋارلارىنا باعانى تۇراقتاندىرۋ جانە تاماق ءوندىرىسىن ىنتالاندىرۋ بويىنشا بەلسەندى جۇمىستى جالعاستىرۋى قاجەتتىگىن باسا ايتتى.

«وزدەرىڭىز بىلەتىندەي، مەملەكەت باسشىسى جولداۋدا ەلىمىزدىڭ ەكونوميكالىق ءوسىمىن ورتا مەرزىمدى كەزەڭدە 6-7 پايىز دەڭگەيىندە قامتاماسىز ەتۋدى تاپسىردى. بۇل - ۇكىمەت پەن اكىمدىكتەر ءۇشىن ماڭىزدى مىندەت. وسى رەتتە، بارلىعىمىزعا ەكونوميكانىڭ نەگىزگى باعىتتارىندا جانە وڭىرلەردە ءتيىستى ءوسىمدى كورسەتۋ ءۇشىن ءتيىمدى شارالار قابىلداۋىمىز كەرەك. مينيسترلىكتەر مەن وڭىرلەر وزدەرىنە قارايتىن ەكونوميكا سالالارىندا اي سايىنعى ورنىقتى ءوسىمدى قامتاماسىز ەتۋى ءتيىس»، - دەدى ءاليحان سمايىلوۆ.