ورتا بيزنەستى قولداۋ ءۇشىن ەلىمىزدە ەشقانداي ەرەكشە جاعداي جاسالماعان - پرەزيدەنت
«ورتا كاسىپكەرلىكتىڭ دامۋىن جەدەلدەتۋ كەرەك. بۇل - قارقىندى دامىپ كەلە جاتقان ەكونوميكانىڭ ورنىقتى ءارى ءارتاراپتاندىرىلعان نەگىزى. ءبىراق بۇل باعىتتا شۇعىل شەشۋدى قاجەت ەتەتىن پروبلەمالار قوردالانىپ قالعان. جالپى العاندا، قازاقستاندا شاعىن جانە ءىرى بيزنەس ءۇشىن وتە جاقسى جاعداي جاسالعان. ءىرى بيزنەس ورنىقتى دامىپ كەلەدى جانە تابىسى مول. ول ءۇشىن مەملەكەتتىك ساياسات قولدانىستاعى ەرەجەلەردىڭ تۇراقتىلىعىن قامتاماسىز ەتۋى، فاۆوريتيزم مەن باسەكەگە قابىلەتسىز تاجىريبەلەردىڭ بولۋىنا جول بەرمەۋى ماڭىزدى. بۇل باعىتتا بەلسەندى جۇمىستى جالعاستىرامىز. شاعىن كاسىپكەرلىك، ءوز كەزەگىندە، جۇمىسپەن قامتۋ ىسىندە جانە حالىقتىڭ تابىسىن ارتتىرۋدا اسا ماڭىزدى ءرول اتقارادى. بۇل رەتتە ولار ءۇشىن سالىق بارىنشا تومەندەتىلدى، تەكسەرۋ ءىس جۇزىندە جوق، قولداۋ قۇرالدارى بار، وزىق ءارى جايلى سيفرلىق ورتا قۇرىلدى، اكىمشىلىك كەدەرگىلەر ۇدايى ازايىپ كەلەدى. الايدا بىزدە ونى بيزنەستىڭ ەڭ ماڭىزدى ورتا سەگمەنتىنە كوشىرۋ ءۇشىن ىنتالاندىرۋ جولدارى قاراستىرىلماعان»، - دەدى پرەزيدەنت.
وسى رەتتە ورتا بيزنەستىڭ سىرتقى نارىقتا دامۋى، باسەكەگە قابىلەتتى جاڭا ونىمدەردى ءوندىرۋى جانە ونى ەكسپورتقا شىعارۋى ءۇشىن مۇمكىندىكتەرى مەن ايتارلىقتاي ىنتالاندىرۋ قۇرالدارى بار.
ونىڭ ايتۋىنشا، ورتا كاسىپكەر الدەقايدا شيراق، موبيلدى جانە قۇبىلمالى نارىقتىق جاعدايلارعا تەز بەيىمدەلەدى.
«ءيا، سوڭعى 7 جىلدا ج ءى و- دەگى شاعىن جانە ورتا كاسىپكەرلىك ۇلەسىنىڭ وسكەنى بايقالادى. ءبىراق بۇل ديناميكانىڭ نەگىزگى قوزعاۋشى كۇشى - شاعىن كاسىپكەرلىك سۋبەكتىلەرى. ولاردىڭ سانى 46 پايىزعا كوبەيدى. وسى ورايدا ورتا كاسىپكەرلىك تەك 0,5 پايىزعا ءوسىپ، ەكونوميكاداعى ۇلەسىن 5 پايىزدان 6,2 پايىزعا دەيىن ارتتىردى. بۇل رەتتە ە ى د ۇ ەلدەرىندە ونىڭ ۇلەسى ورتا ەسەپپەن 18 پايىزعا تەڭ، ال جەكەلەگەن مەملەكەتتەردە ودان دا جوعارى، ياعني 26 پايىزعا دەيىن. ءدال وسى ورتا بيزنەستى، اسىرەسە وڭدەۋ ونەركاسىبىندەگى كاسىپكەرلىكتى قولداۋ ءۇشىن ەلىمىزدە ەشقانداي ەرەكشە جاعداي جاسالماعان. كەرىسىنشە، قازىرگى نورماتيۆتى ورتادا، ولارعا، ءتىپتى كەڭەيگەن كەزدە دە، فورمالدى تۇردە شاعىن بيزنەس بولىپ قالۋ تيىمدىرەك. ۇكىمەتكە جانە «اتامەكەن» پالاتاسىنا وسى ماسەلە بويىنشا ۇسىنىس ەنگىزىپ، ناقتى ىسكە كوشۋدى تاپسىرامىن»، - دەدى قاسىم- جومارت توقايەۆ.
