كاسىپكەرلەر تابىسىن ءوز بيزنەسىنە قايتا سالۋعا قۇلىقسىز - مەملەكەت باسشىسى

استانا. قازاقپارات - مەملەكەت باسشىسى كاسىپكەرلەرمەن كەزدەسۋدە ينۆەستيتسيا تاپشىلىعى سەبەپتەرىنە توقتالدى، دەپ حابارلايدى قازاقپارات اقورداعا سىلتەمە جاساپ.

«ۇلتتىق ەكونوميكانىڭ ءوسىمىن ينۆەستيتسيانىڭ تاپشىلىعى شەكتەپ وتىر. نەگىزگى كاپيتالعا سالىنعان قارجى ستاتيستيكاسىن ەلدىڭ ەرتەڭىنە سەنۋدىڭ باستى كورسەتكىشى رەتىندە قاراستىرۋعا بولادى. الايدا سوڭعى 10 جىلدا كومپانيانىڭ تازا تابىسى مەن نەگىزگى كاپيتالعا سالىنعان ينۆەستيتسيانىڭ اراقاتىناسى 38 پايىزدان 29 پايىزعا دەيىن كەمىدى. باسقاشا ايتقاندا، كاسىپكەرلەر تابىسىن ءوز بيزنەسىنە قايتا ينۆەستيتسيالاۋعا قۇلىقسىزدىق تانىتىپ وتىر. سونىڭ سالدارىنان جاڭا وندىرىستىك قۋات، جاڭا جۇمىس ورىندارىن اشۋ جانە بيۋدجەتكە تۇسەتىن تولەمدەرى عانا ازايمايدى. ءبىز پوزيتسيامىزدان ايىرىلىپ جاتىرمىز. نەگىزگى قورلار فيزيكالىق جانە تەحنولوگيالىق تۇرعىدان ەسكىرىپ، جاڭارماي وتىر. بۇل جالپى پروبلەماعا ينۆەستيتسيالىق اعىندى ءارتاراپتاندىرۋدىڭ باسەڭدەۋى دە اسەر ەتەدى. بىزدەگى شەتەلدىك سالىمنىڭ باسىم بولىگى %68 بۇرىنعىداي شيكىزات سەكتورىنا تيەسىلى. كەرىسىنشە قايتا وڭدەۋ ونەركاسىبى، ەلەكتر قۋاتىن ءوندىرۋ، كولىك جانە باسقا دا سالالاردان شەتەلدىك ينۆەستورلاردىڭ كەتۋى بايقالادى. جۋىرداعى جولداۋىمدا كورپوراتيۆتىك نەسيەلەندىرۋدى قولداۋعا باعىتتالعان شەشىمدەر ايقىندالدى. ەڭ الدىمەن، ينۆەستورلاردى سالىقتان جانە باسقا دا تولەم مىندەتتەمەلەرىنەن ءۇش جىلعا بوساتۋ مىندەتى تۇر. ۇكىمەت بيزنەس- قوعامداستىقپەن بىرلەسىپ، ەكونوميكانىڭ باسىم سەكتورلارىنا ينۆەستيتسيا تارتۋعا ىقپال ەتەتىن قوسىمشا ءۇش- ءتورت ناقتى شارانى پىسىقتاۋى كەرەك»، - دەپ اتاپ ءوتتى قاسىم- جومارت توقايەۆ.