پرەزيدەنت تاياۋدا اكتيۆتەردى قايتارۋ جونىندە زاڭ قابىلداناتىنىن ايتتى

استانا. قازاقپارات - مەملەكەت باسشىسى كاسىپكەرلىك وكىلدەرىمەن كەزدەسۋدە اكتيۆتەردى قايتارۋ كەزىندە مەملەكەت پەن بيزنەستىڭ مۇددەلەرى اراسىنداعى تەڭگەرىمدى ساقتاۋ ماڭىزدى ەكەنىن ايتتى، دەپ حابارلايدى قازاقپارات.

قاسىم- جومارت توقايەۆ مۇنى سالاداعى باسىم مىندەتتەردىڭ ەكىنشىسى رەتىندە اتادى.

«بۇل - قازىر كاسىپكەرلەر اراسىندا قىزۋ تالقىلانىپ جاتقان تاقىرىپتاردىڭ ءبىرى. ودان حاباردارمىن. ول جونىندە بولەك اقىلداسايىق. تاياۋدا اكتيۆتەردى قايتارۋ جونىندە زاڭ قابىلداندى. بۇل زاڭ اكتيۆتەردى قايتارۋ شارالارىن ءبىر ماقساتقا جۇمىلدىرۋعا باعىتتالعان، ياعني، مۇنى قوعامدىق كەلىسىم اكتىسى دەسە دە بولادى. تۇپتەپ كەلگەندە، بۇل شارا ەكونوميكامىزدى ساۋىقتىرىپ، الەۋمەتتىك جىككە بولىنۋشىلىك پەن ادامداردىڭ اراسىنداعى الشاقتىقتىڭ الدىن الۋعا ءتيىس»، - دەدى ول.

پرەزيدەنتتىڭ سوزىنشە، ادال بيزنەسكە، شەتەلدىك جانە وتاندىق ينۆەستورلارعا بۇدان قاۋىپتەنۋدىڭ ەش رەتى جوق.

«مەن جولداۋىمدا جوعارى دەڭگەيدە وڭدەلگەن ءونىم شىعاراتىن كلاستەر قۇرۋ كەرەك ەكەنىن ايتتىم. ەكونوميكامىزدىڭ كوشباسشىلارى يندۋستريالاندىرۋدىڭ قوزعاۋشى كۇشىنە اينالىپ، سوڭىنان ونەركاسىپپەن اينالىسۋشى كاسىپكەرلەردىڭ جاڭا تولقىنىن ىلەستىرە الادى. مەن مەتاللۋرگيا، حيميا، ماشينا جاساۋ جانە باسقا دا سالالاردا، كەم دەگەندە، 15 ءىرى جوبانى ىسكە اسىرۋ مىندەتىن جۇكتەدىم. بۇل - مەملەكەتتىڭ دە، بيزنەستىڭ دە مىندەتى. بيۋدجەتتىڭ مۇمكىندىكتەرى شەكتەۋلى. بۇعان قوسا، مەملەكەت تاعايىنداعان مەنەدجەرلەر دە ءتيىستى دەڭگەيدە جۇمىس ىستەمەيدى»، - دەدى توقايەۆ.

سوندىقتان ول ەلىمىزدىڭ الەۋەتتى ءىرى بيزنەس وكىلدەرىنە ۇندەۋ تاستاعىسى كەلەتىنىن جەتكىزدى.

«سىزدەردە قارجى دا، تاجىريبە دە جەتكىلىكتى، الەمدىك نارىقتارعا شىعاتىن بايلانىستار دا بار. سوندىقتان وسىنداي جوبالاردى جۇزەگە اسىرۋ ماسەلەسىن قاراستىرۋعا شامالارىڭىز جەتەدى. ەلدىڭ دامۋىنا قارجى قۇيۋعا دايىن ەكەندەرىڭىزدى كورسەتىڭىزدەر»، - دەدى مەملەكەت باسشىسى.

ونىڭ پايىمىنشا، ادال ءارى ءوز ەلىنە پايدامدى تيگىزسەم دەگەن نيەتتەگى بيزنەس ءاردايىم قۇرمەتكە لايىق جانە ولار مەملەكەتتىڭ قورعاۋىندا بولادى.

«اشىعىن ايتايىن. جوعارى دا ايتىلعان وندىرىستەرگە ينۆەستيتسيا سالۋ اكتيۆتەردىڭ ءتۇپ توركىنىنىڭ زاڭدىلىعىن دالەلدەۋگە تالپىنىس رەتىندە قاراستىرىلادى.

ەگەر ءسىز بۇرىن- سوڭدى يە بولعان كاپيتال تەك مەنشىك يەسىنە عانا ەمەس، سونداي- اق ۇلتتىق ەكونوميكانىڭ يگىلىگىنە جانە قازاقستاننىڭ وركەندەۋىنە قىزمەت ەتسە، وندا بۇل - اقشانىڭ قايدان كەلگەنى جونىندەگى سۇراقتى كۇن تارتىبىنەن الىپ تاستاۋعا جاقسى سەبەپ. الايدا مۇنداي مامىلەگە كەلۋ مۇمكىندىگى بارعان سايىن ازايىپ كەلەدى. ونى دا ءتۇسىنۋ كەرەك.

ۇكىمەت ەكونوميكانى ءارتاراپتاندىرۋ ءۇشىن ءىرى بيزنەستىڭ بۇكىل قارجىلىق، تەحنولوگيالىق جانە كادرلىق الەۋەتىن جۇمىلدىرۋى قاجەت»، - دەدى پرەزيدەنت.