اتىراۋدا بالىق اۋلاۋعا كەتكەن جىگىت ءۇش كۇننەن بەرى تابىلماي جاتىر

اتىراۋ. قازاقپارات - اتىراۋدا بالىق اۋلاۋعا بارعان جىگىت ءۇش كۇننەن بەرى تابىلماي جاتىر، دەپ حابارلايدى قازاقپارات ءتىلشىسى.

اتىراۋ وبلىستىق پوليتسيا دەپارتامەنتىنىڭ باسپا ءسوز قىزمەتىنەن ءمالىم ەتكەندەي، 36 جاستاعى جىگىت 10- قىركۇيەكتە ءىز- ءتۇزسىز جوعالىپ كەتكەن.

«جوعالعان جىگىتتىڭ اتى- ءجونى - ەربول قۇسايىنوۆ. تۋىستارىنىڭ ايتۋىنشا، ول 10- قىركۇيەك كۇنى دوستارىمەن بىرگە بالىق اۋلاۋعا كەتىپ، ۇيىنە قايتىپ ورالماعان. ونى ىزدەستىرۋ جۇمىسى بۇگىن ءۇشىنشى كۇن قاتارىنان جالعاسىپ جاتىر. ىزدەۋ جۇمىسىنا اتىراۋ وبلىسى پوليتسيا جانە توتەنشە جاعدايلار دەپارتامەنتتەرىنىڭ قىزمەتكەرلەرى، ۇلتتىق ۇلاننىڭ 80 ساربازى تارتىلدى»، - دەپ حابارلادى دەپارتامەنتتىڭ باسپا ءسوز قىزمەتى.

سونداي- اق، كينولوگيا بولىنىستەرى مەن سۇڭگۋىرلەر دە ىزدەۋ جۇمىستارىنا جۇمىلدىرىلعان.

«اتىراۋ وبلىسىنىڭ تۇرعىندارى مەن قوناقتارىنا الەۋمەتتىك جەلىدە الىپ- قاشپا اقپاراتتاردى تاراتپاۋدى ەسكەرتەمىز. جوعالعان جىگىتكە قاتىستى دەرەكتەر بولسا، 102 وپەراتورىنا حابارلاۋ سۇرالادى»، - دەپ ءمالىم ەتتى دەپارتامەنتتىڭ باسپا ءسوز قىزمەتى.