الماتى وبلىسىندا اسپيرين ءىشىپ ولمەك بولعان وقۋشىنىڭ جاعدايى قالاي

قونايەۆ. قازاقپارات- الماتى وبلىسىندا ءبىر قوراپ اسپيرين ءىشىپ ءوز-وزىنە قول جۇمساماق بولعان وقۋشىنىڭ جاعدايى بەلگىلى بولدى، دەپ حابارلايدى قازاقپارات ءتىلشىسى.

الماتى وبلىستىق ءبىلىم باسقارماسى ءمالىم ەتكەندەي، اتالعان جاعدايعا بايلانىستى ارنايى جۇمىس توبى قۇرىلعان.

ولار ءتيىستى تالداۋ جاساپ، زەرتتەۋ جۇرگىزەدى. سونىمەن قوسا بارلىق مەكتەپتە پروفيلاكتيكالىق جۇمىس قولعا الىنعان.

«ماقسات - وقۋشىلارعا قاۋىپسىز ءارى ىڭعايلى ورتا قۇرىپ، ساپالى ءبىلىم بەرۋ»، - دەپ اتاپ ءوتتى باسقارمادان.

ۆەدومستۆو وكىلدەرى قازىرگى تاڭدا وقۋشىنىڭ جاعدايى ءبىرقالىپتى ەكەنىن ايتتى.

«بالا بۇگىن ساباققا قاتىستى. ونىمەن مەكتەپ مۇعالىمدەرى، پسيحولوگتار، مەيىربيكە جۇمىس ىستەپ جاتىر»، - دەلىنگەن حابارلامادا.

ەسكە سالا كەتەيىك، ءبىز بۇعان دەيىن الماتى وبلىسىندا باستاۋىش سىنىپ وقۋشىسى ءبىر قوراپ ءدارى ءىشىپ، ومىرىمەن قوشتاسپاق بولعانىن حابارلاعان ەدىك.