مۇعالىم: قاراعاندى مەكتەبىندە پاتريوتيزم ساباعىن وتپەسە دە، وقۋشىلاردى ءوتتى دەپ ايتۋعا ماجبۇرلەگەن
ونىڭ ايتۋىنشا، مەكتەپتە «پاتريوتيزم جانە جاھاندىق قۇزىرەتتىلىك» ءپانى وتكىزىلمەگەن. الايدا، قۇجات بويىنشا بۇل ءپان وقىتىلىپ، وسى ساعاتتار ءۇشىن مۇعالىمدەرگە اقى تولەنگەن. مەكتەپ وكىلدەرى بولسا وقۋشىلاردان ول ءپان ءوتتى دەپ ايتۋىن تالاپ ەتكەن.
بۇگىن الەۋمەتتىك جەلىدە قاراعاندى قالاسى №5-مەكتەبىنىڭ مۇعالىمى تۇسىرگەن ۆيدەو پايدا بولدى.
«ماعان 2022-2023 وقۋ جىلىندا «پاتريوتيزم جانە جاھاندىق قۇزىرەتتىلىك» ءپانى وقىتىلماعانى تۋرالى اقپارات كەلدى. سىزدەرگە رەسمي تۇردە مالىمدەيمىن، مەن جارليكوۆ يگور يۋريەۆيچ، قاراعاندى وبلىسىنىڭ وبلىستىق پروكۋراتۋراسىنا جازباشا ءوتىنىش جولدادىم جانە اتاپ وتكەن ادامداردى جاۋاپكەرشىلىككە تارتۋدى تالاپ ەتەتىنىمدى حابارلادىم»، - دەيدى بەينەروليكتە №5-مەكتەپتىڭ تاريح ءپانىنىڭ مۇعالىمى يگور جارليكوۆ.
مۇعالىمنىڭ ايتۋىنشا، ارىز جازۋىنىڭ سەبەبى - مۇعالىمدەر وقۋشىلاردى وتكەن وقۋ جىلىندا «پاتريوتيزم جانە جاھاندىق قۇزىرەتتىلىك» ءپانىن وتكەنىن راستاۋعا ماجبۇرلەپ وتىر.
سونىمەن قاتار، ول مۇعالىمدەردىڭ بالالارعا قوقان-لوققى كورسەتكەنىن حابارلادى.
«قازىر ماعان ۇزىلىستە 11-سىنىپ وقۋشىلارى كەلىپ، «يگور يۋريەۆيچ، بىزگە ادامداردىڭ اتى- ءجونىن بەرىپ، «پاتريوتيزم جانە جاھاندىق قۇزىرەتتىلىك» ءپانى وتكىزىلدى دەپ جازۋعا ماجبۇرلەپ جاتىر. سونىمەن قاتار ولار ءبىزدى قورقىتىپ وتىر، ەگەر ولاي جازباساق، جاعدايىمىز مۇشكىل بولادى دەپ قورقىتتى» دەدى. تاعى دا ايتامىن، سىزدەردىكى راس بولسا، ەشقاشان قورىقپاڭىزدار. «پاتريوتيزم مەن جاھاندىق قۇزىرەتتىلىك» ءپانىن وقىتتى دەگەن مۇعالىمدەر الاتىن جالاقى - بۇل سىزدەردىڭ اتا-اناڭىزدىڭ، سالىق تولەۋشىلەردىڭ اقشاسى. ءبىراق قازىر ەڭ باستىسى - سىزدەر جانە سىزدەردىڭ ۇستانىمىڭىز»، - دەيدى مۇعالىم ۆيدەودا.
سودان كەيىن ول ەكى مەكتەپ قىزمەتكەرىنىڭ قاتىسۋىمەن وقۋشىلاردان «بۇل ءپان شىنىمەن وقىتىلدى ما؟» دەپ سۇرايدى. وقۋشىلاردىڭ ءبارى «جوق» دەپ جاۋاپ بەرەدى.
قاراعاندى وبلىسىنىڭ ءبىلىم باسقارماسى تۇسىندىرگەندەي، قازىر اتالعان مەكتەپتە ارنايى كوميسسيا تەكسەرۋ جۇرگىزىپ جاتىر.
«№5-مەكتەپ مۇعالىمى ي. جارليكوۆ جاريا ەتكەن مالىمدەمەسىندە اتاپ وتكەن ساباقتىڭ شىن مانىندە وتكەن-وتپەگەنىنە قاتىستى مالىمەتتى پروكۋراتۋرا زەردەلەپ، تەكسەرەدى. ايتىلعان اقپارات راستالماعان جاعدايدا مەكتەپ اكىمشىلىگى بەدەلىن قورعاۋ ءۇشىن سوت ورگاندارىنا جۇگىنە الادى. بۇدان باسقا، بەينەوتىنىش جازىلعاننان كەيىنگى كۇندەردە وقىتۋشىنىڭ ساباقتا بولماۋى ەڭبەك زاڭناماسىن تىكەلەي بۇزۋ رەتىندە باعالانادى»، - دەپ حابارلادى ۆەدومستۆودان.
وبلىستىق پروكۋراتۋرا بەينەجازبانى جانە مۇعالىمنىڭ ءسوزىن ۋاكىلەتتى ورگاندار تەكسەرىپ جاتقانىن حابارلادى.
Посмотреть эту публикацию в Instagram
اۆتور:
اگاتا مۋحامەدجانوۆا
