الماتىدا الاپات ءزىلزالا بولسا، حالىق قايدا پانالاي الادى

الماتى. قازاقپارات - الماتىدا قالالىق اۋقىمدا سەيسميكالىق جاتتىعۋ ءوتتى، دەپ حابارلايدى قازاقپارات ءتىلشىسى.

الماتى قالالىق توتەنشە جاعدايلار دەپارتامەنتى حابارلاعانداي، سەيسميكالىق وقۋ-جاتتىعۋدىڭ نەگىزگى ماقساتى - قالا تۇرعىندارىنىڭ توتەنشە جاعداي كەزىندەگى ءىس-قيمىلعا دايىندىعىن ارتتىرۋ، تۇرعىنداردى ەۆاكۋاتسيالاۋ جولدارىن، قاۋىپسىز جەرلەردى الدىن الا انىقتاپ، اپاتتىق چەمودان دايىنداۋ بولدى.

بۇل رەتتە حالىقتى قۇلاقتاندىرۋ ماقساتىندا جالپىقالالىق سەيسميكالىق جاتتىعۋعا الدىن الا دايىندىق جۇرگىزىلدى.

ماسەلەن، ەكى كۇننەن بۇرىن تەلەارنالار مەن راديوارنالاردا حابارلاندىرۋ باستالىپ، الماتىلىقتار وقۋ-جاتتىعۋعا قاتىستى ەۆاكۋاتسيالاۋ تۋرالى اقپاراتتاندىرىلىپ، ۇسىنىس بەرىلدى.

سەيسميكالىق وقۋ-جاتتىعۋ كۇنى تەلە جانە راديوارنالار سيرەنالىق قوندىرعىلاردى ىسكە قوسۋ ارقىلى قالالىق ەسكەرتۋ جۇيەسى ىسكە قوسىلىپ، «دارمەن» موبيلدى قوسىمشاسى ارقىلى push-حابارلاما جىبەرىلدى.

ۆەدومستۆونىڭ مالىمەتىنشە، قالادا ۇلكەن ءزىلزالا بولعان جاعدايدا شارتتى تۇردە باسپاناسىز قالعان ادامدارعا 384 قابىلداۋ پۋنكتى اشىلادى.

ول جايىندا وسى سىلتەمەدە تولىق مالىمەت بەرىلگەن.

«اتالعان پۋنكتەر حالىقتى جيناۋعا، تىركەۋگە، ۋاقىتشا ورنالاستىرۋعا، زارداپ شەككەن حالىقتى قاجەتتى زاتتارمەن (سۋ، تاماق، ازىق-تۇلىك) قامتاماسىز ەتۋگە، كولىككە وتىرعىزىپ، قاۋىپسىز اۋداندارعا ەۆاكۋاتسيالاۋعا ارنالعان. باسپاناسىز قالعان، زارداپ شەككەن حالىقتى قابىلداۋدىڭ 384 پۋنكتى تۋرالى تولىق اقپارات 2GIS كارتاسىندا بار، ونى كورۋ ءۇشىن 2GIS- كە «زارداپ شەككەن حالىقتى قابىلداۋ پۋنكتىلەرى» ءسوزىن جازىپ، «ىزدەۋدى» باسۋ كەرەك. اقپاراتتى سونداي-اق الماتى قالالىق ت ج د مەن قالالىق اكىمدىكتىڭ رەسمي سايتتارىنان وقۋعا بولادى»، - دەپ حابارلادى الماتى قالالىق ت ج د باسپا ءسوز قىزمەتى.

بيىلعى 8 ايدا قالا مەكتەپتەرىندە 230 مىڭنان استام وقۋشى قامتىلعان 114 ينتەراكتيۆتى ساباق وتكىزىلدى.

قالا ۇيىمدارىندا 7,2 مىڭنان استام وقۋ-جاتتىعۋ وتكىزىلدى، ولار توقسان سايىن ۇيىمداستىرىلادى.