باقىتجان بازاربەك: بۇل ارەكەت - قاساقانا ارانداتۋ

استانا. قازاقپارات - ءماجىلىس دەپۋتاتى باقىتجان بازاربەك وتباسىنا تيەسىلى بالالار ارباسىن پاتەرىنىڭ الدىندا بەلگىسىز بىرەۋدىڭ ورتەپ جىبەرۋى وقيعاسىنا قاتىستى پىكىر ءبىلدىردى، دەپ حابارلايدى قازاقپارات ءتىلشىسى.

«مەن قاۋىپتىڭ قاي جاقتان ءتونىپ جاتقانىن بىلمەيمىن. دەگەنمەن، بۇل ماسەلەنى قازىرگى جۇمىستارمەن بايلانىستىرامىن. ماسەلەن، قازىر «جەر اماناتى» رەسپۋبليكالىق كوميسسياسىمەن Forbes جۋرنالىنا ەنگەن بىرنەشە وليگارحتىڭ جەرلەرىن تەكسەرىپ جاتىرمىز. ودان بولەك، ءتيىستى زاڭ جوبالارىن پىسىقتاپ جاتىرمىز. سوندىقتان قاي جاقتان قاۋىپ ءتونىپ تۇرعانىن ناقتى ايتا المايمىن» ، - دەدى ب. بازاربەك ماجىلىستە زاڭ جوباسىنىڭ تانىستىرىلىمىنان كەيىن تىلشىلەر سۇراعىنا جاۋاپ بەرە وتىرىپ.

بۇل تۇرعىدا ول الماتى ماڭىنداعى جەر تەلىمدەرى مەن ۇلتتىق پارك اۋماعىنداعى جەرلەردى تەكسەرۋ ءىس- شارالارىنا بەلسەندى تۇردە قاتىسىپ جاتقانىن ايتتى. سونىمەن قاتار، ءىرى قۇرىلىس كومپانيالارىنا تيەسىلى جەر ۋچاسكەلەرى دە تەكسەرىلىپ جاتىر.

«الماتىداعى بۇل وقيعا بويىنشا بەينەكامەرا تۇسىرگەن تاسپانى قارادىم. كۇدىكتى ادام اربانى ورتەپ، كەتىپ قالعان. مەنىڭ ويىمشا، بۇل ارەكەت - قاساقانا ارانداتۋ. كەيىن كۇدىكتى ادام پسيحيكالىق دەرتكە شالدىققان دەپ ءتۇسىندىرۋى مۇمكىندىگىن دە جوققا شىعارمايمىن. اتاپ ايتقاندا، مەن مۇنى كاسىبي قىزمەتىمە بايلانىستى ارانداتۋ ارەكەتى دەپ ەسەپتەيمىن. كەيىنگى كەزدەرى وزىمە قاتىستى قوقان- لوقى جاساماقشى بولعاندار ءجيى كەزدەسە باستادى. بۇل رەسپۋبليكالىق جەر كوميسسياسى بويىنشا قىزمەتتەن باستالدى»، - دەدى دەپۋتات.

باقىتجان بازاربەك بالالار ارباسىن ورتەۋ وقيعاسى بويىنشا پوليتسياعا جۇگىنگەنىن ايتتى.

«مەن ولارعا پارلامەنت دەپۋتاتىنىڭ قىزمەتىنە كەدەرگى كەلتىرۋ بويىنشا قىلمىستىق ءىس قوزعاۋ كەرەك دەپ ايتتىم. الايدا پوليتسيا بۇل باپپەن ەمەس، بۇزاقىلىق بويىنشا قىلمىستىق ءىس قوزعالدى»، - دەدى دەپۋتات.

ەسكە سالساق، بىرنەشە كۇن بۇرىن الەۋمەتتىك جەلىدە ب. بازاربەك بالاسىنىڭ ارباسىن پاتەرىنىڭ الدىندا بەلگىسىز بىرەۋلەر ورتەپ جىبەرگەنىن جازعان ەدى.