قازاقستاندا پويىزدار نەگە ءجيى كەشىگىپ كەلەدى

استانا. قازاقپارات - «جولاۋشىلار تاسىمالى» ا ق باس ديرەكتورى جانىبەك تايجانوۆ پويىزداردىڭ كەستەگە سايكەس جۇرمەۋىنىڭ سەبەبىن ءتۇسىندىردى، دەپ حابارلايدى قازاقپارات ءتىلشىسى.

«پويىزداردىڭ كەشىگۋى بويىنشا بۇعان دەيىن دە بىرنەشە رەت رەسمي تۇسىنىك بەرىلدى. جاز مەزگىلىندە 3 ساعاتقا، كەيدە 6 ساعاتقا دەيىن كەشىگۋلەر بولدى»، - دەپ جاۋاپ بەردى جانىبەك تايجانوۆ ب ا ق وكىلدەرىنىڭ ساۋالىنا.

سونداي-اق، «جولاۋشىلار تاسىمالى» كەشىگۋدىڭ باستى ءۇش سەبەبىن اتاپ ءوتتى.

ءبىرىنشى سەبەپ - جىل سايىن تەمىرجولداردا جوندەۋ جۇمىستارى جۇرگىزىلەدى. ماقسات - تەمىرجول قاتىناسى قاۋىپسىزدىگىن قامتۋ.

ەكىنشى سەبەپ - پويىزداردىڭ جولدان شىعىپ كەتۋى. وسىعان بايلانىستى پويىزدار كەشىگەدى. تەمىرجولدى قالپىنا كەلتىرۋ بەلگىلى ءبىر جۇمىستاردى اتقارۋى قاجەت. بۇل پويىزداردىڭ كەشىگۋىنە الىپ كەلەدى.

ءۇشىنشى سەبەپ - كليماتتىق فاكتورلار. ياعني، اۋا رايى قولايسىزدىعى، بوران، قار تاعى سول سياقتى.

ونىڭ ايتۋىنشا، بيىل پويىزدار كىدىرىسىنىڭ باسىم بولىگى ماگيسترالدىق جولدار بويىنداعى جۇمىستارمەن بايلانىستى.

ودان بولەك، «جولاۋشىلار تاسىمالى» ا ق باس ديرەكتورى جولاۋشىلار پويىزداردىڭ كەشىگىپ كەلگەن ءاربىر ساعاتى ءۇشىن وتەماقى تالاپ ەتە الاتىنىن ەسكە سالدى.

«ءار ساعات ءۇشىن جولاۋشى بيلەت قۇنىنىڭ %3 مولشەرىندە وتەماقى الا الادى. ءبىز بۇل تۋرالى ۆوكزالداعى كاسسالاردا ايتىپ وتىرمىز. بۇل اقپارات بارلىق جەردە بار»، - دەپ تولىقتىردى ول.

بۇعان دەيىن ەلىمىزدە 654 ەسكى ۆاگون جولاۋشى تاسىمالداپ جۇرگەنى تۋرالى حابارلاعان ەدىك.