قازاقستان تاۋارلارىن سىرتقى نارىقتا ىلگەرىلەتۋ ءۇشىن بيۋجەتتەن قاراجات بولىنبەك
بۇل تۋرالى ماجىلىستە «2024-2026-جىلدارعا ارنالعان رەسپۋبليكالىق بيۋجەت تۋرالى» زاڭ جوباسىن تانىستىرۋ كەزىندە قارجى ۆيتسە-ءمينيسترى ابزال بەيسەنبەك ۇلى ايتتى، دەپ حابارلايدى قازاقپارات ءتىلشىسى.
«ەكونوميكانىڭ ناقتى سەكتورىن دامىتۋدى قولداۋعا 2024-جىلعا 2,8 تريلليون تەڭگە قاراستىرىلعان. كاسىپكەرلىكتى ىنتالاندىرۋ ماقساتىندا 2024-جىلى سوماسى 266 ميلليارد تەڭگەگە مەملەكەتتىك قولداۋ كورسەتىلەدى. سونداي-اق قازاقستاندىق تاۋارلاردى سىرتقى نارىقتارعا جىلجىتۋ ءۇشىن كەلەسى جىلى 8,7 ميلليارد تەڭگە بولىنبەك. بۇل 200 ەكسپورتتاۋشىعا قولداۋ كورسەتۋگە، 18 ساۋدا ميسسياسىن جانە شەتەلدە 20 كورمەنى ۇيىمداستىرۋعا مۇمكىندىك بەرەدى»، - دەدى ا. بەيسەنبەك ۇلى.
سونىمەن قاتار ول وڭدەۋ ونەركاسىبىندەگى ءىرى جوبالاردى قارجىلاندىرۋعا 120 ميلليارد تەڭگە باعىتتالاتىنىن ايتتى.
ونەركاسىپ سالالارىن دامىتۋ اياسىندا 64 كاسىپورىنعا مەملەكەتتىك قولداۋ كورسەتۋگە جانە عىلىمي-تەحنيكالىق باعدارلامالاردى وتكىزۋگە 8,7 ميلليارد تەڭگە ءبولۋ جوسپارلانعان.
بۇدان بولەك، ۆيتسە-مينيستر اگرارلىق سەكتوردى دامىتۋعا 3 جىل ىشىندە 1,2 تريلليون تەڭگە جۇمسالاتىنىن ايتتى.
«كوكتەمگى ەگىس جانە ەگىن جيناۋ جۇمىستارىن جەڭىلدەتىلگەن نەسيە بولۋگە جىل سايىن 140 ميلليارد تەڭگە قاراستىرىلعان. «اۋىل اماناتى» باعدارلاماسى شەڭبەرىندە كەلەسى جىلى 100 ميلليارد تەڭگە بولىنەدى. سونداي-اق، سولتۇستىك قازاقستان وبلىسىنىڭ تاجىريبەسى بويىنشا ءىرى ينۆەستيتسيالىق جوبالاردى ىسكە اسىرۋعا دا 100 ميلليارد تەڭگە سوماسىندا نەسيە بەرىلەدى»، - دەدى ابزال بەيسەنبەك ۇلى ماجىلىستە بيۋجەت بويىنشا زاڭ جوباسىن تانىستىرا وتىرىپ.
بۇدان بۇرىن حابارلانعانداي، ەلىمىزدە بيۋجەت شىعىستارىنىڭ نەگىزگى ۇلەسى الەۋمەتتىك سالاعا باعىتتالادى.
