جارق ەتتى دە جوق بولدى: ومىردەن ەرتە وتكەن جۇلدىزدار
بۇگىن جاسىنداي جارق ەتىپ شىعىپ، جالعان دۇنيەمەن ەرتە قوشتاسقان جۇلدىزداردىڭ ءبىرسىپىراسىن ەسكە الماقپىز، دەپ حابارلايدى El.kz اقپارات اگەنتتىگى.
بەكزات ساتتارحانوۆ، بوكستان سيدنەي وليمپياداسىنىڭ چەمپيونى، 20 جاس
قازاقستاننىڭ ەڭبەك سىڭىرگەن سپورت شەبەرى، بوكستان سيدنەي وليمپياداسىنىڭ چەمپيونى بەكزات ساتتارحانوۆ 1980-جىلى 4- ساۋىردە تۇركىستان قالاسىندا دۇنيەگە كەلگەن. قازاق سپورتىنىڭ تاريحىندا ويىپ تۇرىپ ورىن العان بىلعارى قولعاپ شەبەرىنىڭ ءومىرى تىم قىسقا بولدى.
2001-جىلدىڭ باستالۋىنا ساناۋلى مينۋت قالعاندا بوكسشى شىمكەنت قالاسى جانىنداعى تەمىرلان قالاسى ماڭىندا جول اپاتىنا ۇشىرادى. نەبارى 20 جاسىندا تورتكۇل دۇنيەنى بوكستاعى شەبەرلىگىمەن تامساندىرعان بەكزات ساتتارحانوۆ جول اپاتىنان قازا تاپتى.
ورازالى دوسبوسىنوۆ، ايتىسكەر، 29 جاس
ورازالى دوسبوسىنوۆ كوپشىلىكتىڭ ەسىندە وتكىر تىلىمەن، ويىن باتىل جەتكىزۋىمەن ەستە قالدى. تالايدىڭ كوكەيىندە جۇرگەندى ول ساحنادا تۇرىپ قىمسىنباستان ايتاتىن، حالقى ونى سول ءۇشىن دە ەرەكشە جاقسى كوردى، قۇرمەت تۇتتى. وكىنىشكە قاراي، ايتىسكەر اقىننىڭ عۇمىرى قىسقا بولدى.
1975-جىلى 15- قاراشادا رايىمبەك اۋدانىنا قاراستى تەكەس اۋىلىندا دۇنيەگە كەلگەن ورازالى 29 جاسىندا باقيلىققا اتتاندى.
قازاق حالقى ورازالىداي ۇلىنان 2004-جىلعى 30- قازاندا ايىرىلدى. دوسبوسىنوۆ الماتى وبلىسى شونجى اۋىلىنان كەلە جاتقاندا كولىك اپاتىنان كوز جۇمدى.
اجار تۇزەلبەك قىزى، ءانشى، 34 جاس
ورازالى دوسبوسىنوۆتىڭ جارى - ءانشى اجار تۇزەلبەك قىزى دا جالعان دۇنيەمەن ەرتە قوشتاستى. سىڭعىرلاعان ۇنىمەن كوپشىلىكتى باۋراپ العان اجار جولداسىنىڭ ارتىنان التى جىل وتكەندە كەتە باردى. «اناعا حات»، «ساعىندىم سەنى» سەكىلدى اندەردىڭ ورىنداۋشىسى كۇيەۋى سەكىلدى جول اپاتىنا ۇشىرادى. قايعىلى وقيعا الماتى-تالدىقورعان تاس جولىنىڭ بويىندا بولعان. ال ءانشىنىڭ ءوزى قاپشاعاي اۋرۋحاناسىندا كوز جۇمدى.
ءنابي ايمۇراتوۆ، ءانشى، 23 جاس
ءنابي ايمۇراتوۆ جۇرتشىلىققا «گۇلىمسىڭ»، «ەڭ العاشقى ماحاببات»، «مۇمكىن ەمەس» اندەرىمەن تانىلدى. ونىڭ دا ومىردەن ەرتە كەتۋىنە جول اپاتى سەبەپ. حيت اندەرىمەن كوپشىلىكتىڭ سۇيىكتى ورىنداۋشىسىنا اينالىپ كەلە جاتقان ءنابي 2009-جىلى قىزىلوردا وبلىسىنىڭ شيەلى اۋدانىنان الماتىعا قاراي ءان ساپاردان قايتىپ كەلە جاتقاندا جول اپاتىنان قايتىس بولدى.
رۋسلان بولەباي، تەلەجۇرگىزۋشى، 24 جاس
ءدال وسى رۋسلان بولەبايدى كورۋ ءۇشىن ەرتە ويانىپ، «قازاقستان» تەلەارناسىنداعى «تاڭشولپاندى» قوساتىن كورەرمەن كوپ ەدى. 1985-جىلى قىزىلوردا وبلىسى شيەلى كەنتىندە دۇنيەگە كەلگەن تەلەجۇرگىزۋشىگە قامشىنىڭ سابىندا قىسقا عانا عۇمىر بەرىلگەن ەكەن.
ول دا 2009-جىلى 16- شىلدە كۇنى جول كولىك اپاتىنان كوز جۇمدى. وسىلايشا 24 جاستاعى رۋسلاندى حالقى اقتىق ساپارعا شىعارىپ سالدى. رۋسلانمەن بىرگە كولىكتە «BR» توبىنىڭ ءانشىسى باۋىرجان بەگىمبەتوۆ، ءانشى نۇرجان قالجان دا بولعان. باۋىرجان دا سول جول كولىك اپاتىنان قايتىس بولدى.
دەنيس تەن، مانەرلەپ سىرعاناۋدان سوچي وليمپياداسىنىڭ قولا جۇلدەگەرى، 25 جاس
حالىقتىڭ جۇرەگىن قان جىلاتىپ كەتكەن قازا. دەنيس تەن ءتىرى بولعاندا بيىل 13- ماۋسىم كۇنى 30 جاسقا تولار ەدى. امال نەشىك، تالانتتى سپورتشىنىڭ ماڭدايىنا جازىلعانى ەكەن. ءبىراق قىسقا عۇمىرىندا ول بالا كۇنىنەن ارمانداعان ەلىمدى تانىتسام، قازاقستاننىڭ اتىن شىعارسام دەيتىن ارمانىنا قول جەتكىزىپ ۇلگەردى.
1993-جىلى 13- ماۋسىمدا الماتىدا دۇنيەگە كەلگەن دەنيس تەن ءوزىنىڭ سۇيىكتى قالاسىندا اينا ۇرىلارىنىڭ قولىنان اۋىر جاراقات الىپ، ارتىنشا اۋرۋحانادا كوز جۇمدى.
Darkhan Juzz، رەپ ورىنداۋشىسى، 32 جاس
بيىلعى 24- اقپاندا Darkhan Juzz لاقاپاتىمەن تانىمال قازاقستاندىق ءانشى دارحان جۇنىسبەكوۆ ومىردەن ءوتتى. قازاق مۋزىكا مادەنيەتىنە وزىنشە لەپ اكەلگەن ءانشى نەبارى 32 جاستا ەدى.
ول 1991-جىلدىڭ 9- تامىزىندا دۇنيەگە كەلگەن. دارحان اسىرەسە جاستار اراسىندا تانىمال ەدى. ونىڭ وزگەلەردەن ەرەك ءستيلى تىڭدارمانىنىڭ جۇرەگىنەن تەز ارادا-اق ورىن الۋىنا سەبەپ بولدى. وكىنىشكە قاراي، رەپەردىڭ دە ماڭدايىنا قىسقا عۇمىر جازىلعان ەكەن. تايلاندقا دەمالۋعا بارعان دارحان پحۋكەت ارالىندا جول اپاتىنان قايتىس بولدى.
جانار حاميتوۆا، ءانشى، 30 جاس
بالالىق شاعى قاراعاندىدا وتكەن ءانشى ەرتە كەزدەن-اق ونەرگە اۋەس بولىپ ءوستى. سول ونەرىن كوپشىلىككە پاش ەتۋ ءۇشىن جانار 2005-جىلى الماتىعا اتتانىپ، «سۋپەرستار KZ» جوباسىنىڭ قاتىسۋشىسى اتاندى.
كەيىننەن ول نۇرجان كەرمەنبايەۆپەن دۋەتتە ءان ايتىپ، نازىك ۇنىمەن تىڭدارماننىڭ جۇرەگىن جاۋلاپ الدى. ءبىراق كەيىننەن بۇل جۇپ ەكى جاققا كەتىپ، جانار تۇرمىس قۇرىپ، ءومىرىن وتباسىنا ارنادى. وكىنىشكە قاراي، 30 جاسىندا ومىردەن ءوتتى. كەيبىر بولجام بويىنشا، ونىڭ جۇرەگى توقتاپ قالعان.
