پرەزيدەنتتىڭ بەس كۇن بۇرىن تاعايىندالعان باسپا ءسوز حاتشىسى قىزمەتىنەن كەتتى

استانا. قازاقپارات - پرەزيدەنتتىڭ باسپا ءسوز حاتشىسى نۇرمۇحامەد بايعارايەۆ قىزمەتىنەن كەتكەنىن مالىمدەدى، دەپ حابارلايدى قازاقپارات.

«كەشە دەنساۋلىعىما قاتىستى وقىس جاعدايدان سوڭ (پريستۋپتار) دارىگەرلەرگە تەكسەرىلۋگە ءماجبۇر بولدىم. تولىق تەكسەرىستەن كەيىن سىرقاتتىڭ بەلگىسى بايقالدى. دارىگەرلەر ۇزاقمەرزىمدى ەم- دومدى بىردەن باستاۋدى، ونى تۇراقتى قابىلداۋدى جانە باستىسى - ۇشاقپەن ۇشۋدى بەلگىلى ءبىر ۋاقىتقا دەيىن توقتاتۋدى تالاپ ەتتى. مەديتسينالىق تالاپ قازىرگى قىزمەتىمدى تولىققاندى اتقارۋعا كەدەرگىسىن كەلتىرەتىنى بەلگىلى. سەبەبى ايماقتارعا جانە شەتەلدەرگە ءىس- ساپارلار تۇراقتى تۇردە بولادى. بۇل - ءجيى ۇشاقپەن ۇشۋ دەگەن ءسوز. شىنى كەرەك، مۇندايدى ءوزىم دە كۇتپەدىم. جوسپار باسقاشا ەدى. وتكەن اپتادا كىرىسكەن قىزمەتىمە بىلىمىممەن، بىلىكتىلىگىممەن دايىن ەدىم. ءباسپاسوز قىزمەتىن جەتىلدىرۋگە، ودان ءارى اشىق ەتۋگە قاتىستى بىرنەشە يدەيا، باستامالارىم بار ەدى. الايدا «دەنساۋلىق - ءبىرىنشى بايلىق» دەپ بەكەر ايتپاعان. سوندىقتان قانداي قىزمەت بولسا دا، ەڭ الدىمەن، ۋاقىت وتكىزبەي، تولىق ەمدەلىپ الۋ قاجەت دەپ تاپتىم. وسىعان وراي، پرەزيدەنت باسپا ءسوز حاتشىسى قىزمەتىن قازىر توقتاتا تۇرۋىما تۋرا كەلەدى. باسشىلىق جاعدايدى ءتۇسىندى. تۇسىنىستىك تانىتقان بارشا ازاماتقا العىس ايتامىن» دەپ جازدى ول Facebook پاراقشاسىندا.

ەسكە سالا كەتەيىك، نۇرمۇحامەد بايعارايەۆ بۇل قىزمەتكە بەس كۇن بۇرىن عانا تاعايىندالعان ەدى.