ەلىمىزدە بيۋجەت شىعىستارىنىڭ نەگىزگى ۇلەسى الەۋمەتتىك سالاعا باعىتتالادى
بۇل تۋرالى ماجىلىستە «2024-2026-جىلدارعا ارنالعان رەسپۋبليكالىق بيۋجەت تۋرالى» زاڭ جوباسىن تانىستىرۋ كەزىندە قارجى ۆيتسە-ءمينيسترى ابزال بەيسەنبەك ۇلى ايتتى، دەپ حابارلايدى قازاقپارات ءتىلشىسى.
«جالپى، 2024-جىلعا تۇسىمدەر 20,4 تريلليون تەڭگە دەڭگەيىندە قاراستىرىلىپ وتىر. ترانسفەرتتەردى ەسەپتەمەگەندە، 2024-جىلعا ارنالعان كىرىستەر 16,1 تريلليون تەڭگە نەمەسە تۇسىمدەردىڭ جالپى سوماسىنىڭ %80 كولەمىندە جوسپارلانىپ وتىر. كەلەسى جىلى ۇلتتىق قوردان 3,6 تريلليون تەڭگە كولەمىندە ترانسفەرت تارتۋ جوسپارلانعان، ونىڭ ىشىندە نىسانالى ترانسفەرت - 1,6 تريلليون تەڭگە. اتالعان قاراجات الەۋمەتتىك ماڭىزدى جانە ستراتەگيالىق ينفراقۇرىلىمدىق جوبالاردى قارجىلاندىرۋعا باعىتتالادى»، - دەدى ا. بەيسەنبەك ۇلى.
بۇل تۇرعىدا اۆتوموبيل جولدارىن، جىلۋ، گاز جانە سۋمەن جابدىقتاۋ جەلىلەرىن، ينجەنەرلىك جەلىلەردى جاڭعىرتۋ، سونداي-اق «جايلى مەكتەپ»، «اۋىلدا دەنساۋلىق ساقتاۋدى جاڭعىرتۋ» ۇلتتىق جوبالارى اياسىندا ءبىرقاتار الەۋمەتتىك وبەكتىلەردى سالۋ ەسكەرىلگەن.
«2024-جىلى بيۋجەت تاپشىلىعى جالپى ىشكى ونىمگە شاققاندا %2,6 دەڭگەيىندە ەسكەرىلگەن، ال 2026-جىلعا قاراي 2,3 پايىزعا دەيىن بىرتىندەپ تومەندەيدى. بيۋجەتتىڭ 2024-جىلعا ارنالعان شىعىستارى 2023-جىلمەن سالىستىرعاندا 1,5 تريلليون تەڭگەگە ۇلعايىپ، شامامەن 24 تريلليون تەڭگەنى قۇرايدى. اتاپ ايتقاندا، بيۋجەت شىعىستارىنىڭ نەگىزگى ۇلەسى الەۋمەتتىك سالاعا تيەسىلى جانە 2024-جىلعى بيۋجەت شىعىستارىنىڭ 40 پايىزدان استامىن قۇرايدى. 2024-جىلعا الەۋمەتتىك تولەمدەرگە ارنالعان شىعىستار 5,3 تريلليون تەڭگە سوماسىندا قاراستىرىلعان، ونىڭ ىشىندە بازالىق زەينەتاقى مەن جاردەماقىنى ينفلياتسيا دەڭگەيىنە، ىنتىماقتى زەينەتاقىنى ينفلياتسيادان %2 عا ارتىپ يندەكستەلدى. بالالارى بار وتباسىلاردى قولداۋ ءۇشىن بالا كۇتىمى كەزەڭى 1,5 جاسقا دەيىن ۇلعايتىلدى، 2023-جىلدان باستاپ 93 مىڭعا جۋىق كوپ بالالى انالارعا جاردەماقى كوبەيتىلدى. وسى ماقساتقا 2024-جىلى 93,3 ميلليارد تەڭگە كوزدەلگەن. سونداي-اق مەملەكەت باسشىسىنىڭ تاپسىرماسىنا سايكەس ايەلدەردىڭ زەينەتكەرلىك جاسى 61 جاس دەڭگەيىندە 2028-جىلعا دەيىن قالدى. بۇل 150 مىڭنان استام ادامعا قاتىستى بولادى جانە ەسەپتى كەزەڭدە 473 ميلليارد تەڭگەگە جۋىق قاراجاتتى قاجەت ەتەدى»، - دەدى ۆيتسە-مينيستر.
ونىڭ ايتۋىنشا، حالىقتىڭ تابىسىن ارتتىرۋ باعدارلاماسىن ىسكە اسىرۋ ءۇشىن 2024-جىلى 3,5 تريلليون تەڭگە قاراستىرىلعان.
