بالا ەڭ الدىمەن ءبىلىم الۋى كەرەك، ال ءدىني سەنىمىن ەرجەتە كەلە ءوزى شەشەدى - بالايەۆا

استانا. قازاقپارات - مادەنيەت جانە اقپارات ءمينيسترى ايدا بالايەۆا مۇسىلمان كيىمى حيدجاب توڭىرەگىندەگى شۋعا پىكىر ءبىلدىردى، دەپ حابارلايدى قازاقپارات.

مينيستر بۇل جايىندا Facebook پاراقشاسىندا جازدى.

«قازىر الەۋمەتتىك جەلىدە مەكتەپتەردە حيدجاب كيۋ ماسەلەسىنە قاتىستى تالقى توقتار ەمەس. وسىعان بايلانىستى ءدىني سالاعا جاۋاپتى لاۋازىمدى تۇلعا رەتىندە، ءوز تاراپىمنان تۇسىنىكتەمە بەرۋدى ءجون كورىپ وتىرمىن. اتازاڭىمىزعا سايكەس قازاقستاندا ءدىن مەملەكەتتەن بولىنگەن. ءسوز جوق، مەملەكەت ءدىن بوستاندىعىنا كەپىلدىك بەرەدى. ءبىراق ءبىز - زايىرلى ەلمىز! سول ءۇشىن دە مەملەكەتتىك ساياساتتىڭ بارلىق ماسەلەلەرى ءدىني پاتۋالارمەن ەمەس، ازاماتتىق نورمالارمەن رەتتەلەدى»، - دەپ اتاپ ءوتتى ايدا بالايەۆا.

ونىڭ ايتۋىنشا، قۇقىقتىق- ءنورماتيۆتى اكتىلەر ءاربىر وقۋشىعا مەكتەپ قابىرعاسىندا ارنايى بەكىتىلگەن فورما كيۋدى مىندەتتەيدى.

ويتكەنى، ءبىلىم بەرۋ ەرەكشەلىگى ءبىرىڭعايلىقتى تالاپ ەتەدى.

«ال كونستيتۋتسيامىز بويىنشا مەكتەپتىڭ مىندەتى - ەل ازاماتتارىنا ساپالى ءبىلىم بەرۋگە كەپىلدىك بەرۋ جانە ونى قامتاماسىز ەتۋ. سوندىقتان دا، مەكتەپتە بالا ەڭ الدىمەن ساپالى ءبىلىم الۋى كەرەك. سودان كەيىن بارىپ، ەرجەتە كەلە ءدىني نانىم- سەنىمىن، قانداي كيىم ۇلگىسىن كيەتىنىن ءوزى شەشەدى دەپ ويلايمىن»، - دەپ تۇيىندەدى مينيستر.

ەسكە سالا كەتەيىك، مەكتەپتەگى ورامال ماسەلەسىنە بۇگىن قازاقستان مۇسىلماندارى ءدىني باسقارماسى دا تۇسىنىك بەرگەن بولاتىن.