التاي كولگىنوۆتىڭ كەزىندە جۇمىس ىستەگەن اكىمدىك قىزمەتكەرلەرى قانداي كۇدىككە ءىلىنىپ وتىر

استانا. قازاقپارات - استانا قالاسىنىڭ پروكۋراتۋراسى جەر جانە ساۋلەت- قالا قۇرىلىسى سالاسىنداعى زاڭنامانى بۇزۋ فاكتىلەرى بويىنشا اكىمدىك ۇستىنەن جۇرگىزىلگەن تەكسەرۋ كەزىندە قانداي فاكتىلەر انىقتالعانىن ءتۇسىندىردى، دەپ حابارلايدى قازاقپارات ءتىلشىسى.

قۇزىرلى ورگاننىڭ مالىمەتىنە قاراعاندا، تەكسەرۋ كەزىندە قۇرىلىس جوباسىنا تۇزەتۋ ەنگىزۋ، مەملەكەتتىك مەنشىكتەن جەر تەلىمدەرىن بەرۋ، جوبالاۋ- ىزدەستىرۋ جۇمىستارىنا رۇقسات بەرۋ، سىزبا جوباسىن ماقۇلداۋ ماسەلەلەرى بويىنشا زاڭ بۇزۋ فاكتىلەرى تىركەلگەن.

«لاۋازىمدى تۇلعالاردىڭ ارەكەتىنە باعا بەرۋ ءۇشىن مەتاريالدار استانا قالاسى بويىنشا سىبايلاس جەمقورلىققا قارسى ءىس- قيمىل قىزمەتىنە جولداندى. ول ماتەريالدار استانا قالاسى اكىمدىگىنىڭ قىزمەتكەرلەرى ۇستىنەن قىلمىستىق كودەكستىڭ 361-بابى بويىنشا (لاۋازىمدىق وكىلەتتىگىن اسىرا پايدالانۋ - رەد.) قوزعالعان №230000121000017 قىلمىستىق ءىستىڭ ماتەريالدارىنا قوسىلدى»، - دەلىنگەن پروكۋراتۋرانىڭ رەداكسيا ساۋالىنا جولداعان جاۋابىندا.

دەگەنمەن، بۇل ءىس اكىمدىكتىڭ نەشە قىزمەتكەرىنىڭ ۇستىنەن قوزعالعانى تۋرالى مالىمەت بەرمەدى.

بۇل مالىمەتتىڭ ءبارى قىلمىستىق- پروتسەسسۋالدىق كودەكستىڭ 201-بابى بويىنشا سوتقا دەيىنگى تەرگەۋدىڭ قۇپياسى رەتىندە جاريالاۋعا جاتپايتىنى ايتىلعان.

ەسكە سالساق، استانا پروكۋراتۋراسى اكىمدىك قىزمەتكەرلەرىن تەكسەرۋ ءۇشىن انتيكورعا ماتەريالدار جولداعان بولاتىن.

وعان دەيىن دە ب ا ق- تا 2019-2022 -جىلدار ارالىعىندا جەر ۋچاسكەلەرىن بەرۋگە جانە قالادا قۇرىلىس سالۋعا جاۋاپتى استانا اكىمدىگىنىڭ بولىمشەلەرىن تەكسەرۋ ءجۇرىپ جاتقانى تۋرالى اقپارات تاراعان.

بۇل كەزەڭدە ەلوردا اكىمى التاي كولگىنوۆ بولعان ەدى.

پروكۋراتۋرا ماماندارى باستاپقىدا ونداعان مەكتەپ، اۋرۋحانا مەن بالاباقشا سالۋ جوسپارىنا 61 رەت تۇزەتۋ ەنگىزىلىپ، سالدارىنان الەۋمەتتىك نىساندار بوي كوتەرۋى ءتيىس تەلىمدەرگە تۇرعىن ۇيلەر سالىنىپ كەتكەن.