قازاقستان مەن تۇركيا ترانسكاسپي ءدالىزى ارقىلى تاۋار تاسىمالىن ارتتىرۋعا مۇددەلى

استانا. قازاقپارات - قازاقستان مەن تۇركيا ترانسكاسپيي حالىقارالىق ءدالىزى ارقىلى تاۋار تاسىمالىن ارتتىرۋعا نيەتتى.

مۇنى ەلىمىزگە رەسمي ساپارمەن كەلگەن تۇركيانىڭ سىرتقى ىستەر ءمينيسترى حاكان فيدانمەن كەزدەسكەننەن كەيىن بىرلەسكەن مالىمدەمە جاساعان ق ر سىرتقى ىستەر ءمينيسترى مۇرات نۇرتىلەۋ ايتتى، دەپ حابارلايدى قازاقپارات ءتىلشىسى.

«قازىر الەمدەگى گەوساياسي جانە گەوەكونوميكالىق احۋال كۇردەلى بولىپ تۇرعانىن بىلەسىزدەر. وسى ورايدا، ءبىز كولىك- ترانزيت سالاسىنداعى مۇمكىندىكتەردى ءارى قاراي ارتتىرۋعا باسا نازار اۋداردىق. اتاپ ايتقاندا، ترانسكاسپي حالىقارالىق كولىك ءدالىزىنىڭ الەۋەتىن تولىق پايدالانۋ ارقىلى تاسىمالدى ۇلعايتۋ قاجەت دەگەن بايلامعا كەلدىك. بۇعان قوسا، ترانزيتتىك باعدارلاردىڭ ديۆەرسيفيكاتسياسى رەتىندە قازاقستان- تۇرىكمەنستان- يران- تۇركيا تەمىر جولىن تۇرىك تاراپى پايدالانۋ مۇمكىندىگىن ورتاعا سالدىق»، - دەدى مۇرات نۇرتىلەۋ.

مينيستر اتاپ وتكەندەي، سونىمەن بىرگە ەكى ەل اسكەري جانە قورعانىس ونەركاسىبى سالالارىندا دا ىنتىماقتاستىقتى نىعايتۋعا مۇددەلى.

«تاعى ءبىر وزەكتى ماسەلە - ول اسكەري جانە قورعانىس- ونەركاسىپ سالاسىنداعى ىنتىماقتاستىق. ەلىمىزدىڭ قاۋىپسىزدىگىن قامتاماسىز ەتۋ ىسىندە بۇل باعىتتىڭ ماڭىزى وتە زور»، - دەپ توقتالدى مۇرات نۇرتىلەۋ.

سونىمەن قاتار ۆەدومستۆو باسشىسى قاراشادا تۇركىستان قالاسىندا وتەتىن تۇركى مەملەكەتتەرىنىڭ مەرەيتويلىق 10- سامميتىنە قاتىسۋ ءۇشىن تۇركيا پرەزيدەنتى رەجەپ تايپ ەردوعان كەلەتىنىن اتاپ ءوتتى.

بۇعان قوسا، بيىل 7 ايدا قازاقستان مەن تۇركيا اراسىنداعى ساۋدا اينالىمى 3,6 ميلليارد دوللارعا جەتتى.