توقايەۆ قىتاي ءتىلىن قانشا ۋاقىتتا مەڭگەرگەنىن ايتتى

استانا. قازاقپارات - پرەزيدەنت قاسىم-جومارت توقايەۆ سۇلەيمەن دەمەرەل اتىنداعى ۋنيۆەرسيتەتىندە ستۋدەنتتەرمەن كەزدەسىپ، قىتاي ءتىلىن قانشا ۋاقىتتا ۇيرەنگەنىن ايتتى، - دەپ حابارلايدى ماسساگەت.

6-قىركۇيەكتە قاسىم-جومارت توقايەۆ الماتى وبلىسىنا رەسمي ساپارى بارىسىندا سۇلەيمەن دەميرەل اتىنداعى ۋنيۆەرسيتەتكە دە بارعان ەدى. ۋنيۆەرسيتەتتە 8500 دەن اسا ستۋدەنت وقيدى، ولاردىڭ ىشىندە ورتالىق ازيا، قىتاي، رەسەي، موڭعوليا، يندونەزيا سەكىلدى مەملەكەتتەردىڭ ازاماتتارى بار.

كەزدەسۋ بارىسىندا 3-كۋرس ستۋدەنتى ۇلمەكەن پرەزيدەنتكە قىتايشا سۇراق قويدى.

«مەنىڭ سىزگە ءبىر سۇراعىم بار ەدى. ءسىز قىتاي ءتىلىن قانشا ۋاقىتتا مەڭگەردىڭىز؟ مەن 2 جىل بويى قىتاي ءتىلىن وقىپ كەلەمىن، ءبىراق ماعان ءالى قيىن»، - دەدى ستۋدەنت.

مەملەكەت باسشىسى قىتاي ءتىلىن قانشا جىلدا مەڭگەرگەنىن جانە قايدا جۇمىس ىستەگەنىن ءبولىستى.

«مەن قىتاي ءتىلىن 5 جىل وقىدىم. الدىمەن م گ ي م و-دا (ماسكەۋ مەملەكەتتىك حالىقارالىق قاتىناستار ينستيتۋتى - ە س ك.)، كەيىن سينگاپۋرعا بارىپ، وندا 4 جىل جۇمىس ىستەدىم. كەيىن قايتا ماسكەۋگە كەلىپ، سوندا 3 جىل قىزمەت ەتتىم. ودان سوڭ بەيجىڭگە بارىپ، بەيجىڭ لينگۆيتيكالىق ينستيتۋتىندا 1 جىل وقۋىمدى جالعاستىردىم»، - دەيدى توقايەۆ.

ەسكە سالايىق، بۇعان دەيىن انگولا ازاماتىنىڭ توقايەۆپەن قازاق تىلىندە سويلەسكەنى حابارلانعان ەدى.

انگولا ازاماتى ەليشا فەرەيرا مەملەكەت باسشىسىمەن قازاق تىلىندە تىلدەسكەن. ول قازىر 4-كۋرستا وقىپ جاتىر.

«ءبىزدىڭ ۋنيۆەرسيتەتكە قوش كەلدىڭىزدەر. ەسىمىم - ەليشا. انگولادان كەلدىم. ءسىزدى كورگەنىمە وتە قۋانىشتىمىن. قازىر قوڭىرات بولدىم. قازاق ەلى جاساي بەرسىن!» - دەيدى ەليشا فەرەيرا.