قوقىستى جيناپ شىقتى. توقايەۆ استانالىق ەرىكتىلەر مەن جانكۇيەرلەرگە العىس ايتتى

استانا. قازاقپارات - مەملەكەت باسشىسى قاسىم-جومارت توقايەۆ قازاقستان ۇلتتىق قۇراماسىنىڭ جەڭىسى تۋرالى جىلى لەبىزىن ءبىلدىرىپ، ەلوردالىق ەرىكتىلەر مەن بەلسەندىلەرگە العىس ايتتى.

پرەزيدەنت Instagram-پاراقشاسىندا قازاقستان ۇلتتىق قۇراماسىنىڭ جەڭىسى تۋرالى جازبا جاريالادى.

«ءبىزدىڭ ۇلتتىق قۇرامانىڭ سولتۇستىك يرلانديانىڭ مىقتى كومانداسىمەن الاڭداعى كەزدەسۋىن قىزىعا تاماشالادىم. ويىن وتە قىزىقتى ءارى تارتىستى ءوتتى. قازاق فۋتبولشىلارى قارسىلاس كومانداعا توتەپ بەرىپ، 1:0 ەسەبىمەن لايىقتى جەڭىسكە قول جەتكىزدى. قازاقستان ۇلتتىق قۇراماسى جانە ولاردىڭ مىڭداعان جانكۇيەرى ءۇشىن قۋانىشتىمىن»، - دەدى توقايەۆ.

سونداي-اق، ول ەرىكتىلەر مەن جانكۇيەرلەرگە العىسىن ءبىلدىردى.

«اسىرەسە «استانا جاستارى» مەن باسقا دا ۇيىمدار ەرىكتىلەرىنىڭ، سونداي-اق، جەكەلەگەن ازاماتتاردىڭ، بەلسەندىلەردىڭ ۇلگى الارلىق ءىسىن ايرىقشا اتاپ وتكىم كەلەدى. ولار ويىننان سوڭ ستاديوندا قالىپ، تريبۋناداعى قوقىستى جيناپ شىقتى. فۋتبولشىلارىمىزدى جانە جاستارىمىزدى ماقتان تۇتامىن»، - دەپ جازدى مەملەكەت باسشىسى.

ەسكە سالايىق، فۋتبولدان قازاقستان ۇلتتىق قۇراماسى «استانا ارەنادا» سولتۇستىك يرلانديا قۇراماسىن ۇتتى. ويىندا وتانداستارىمىز 1:0 ەسەبىمەن جەڭىسكە جەتتى.

قازاقستان قۇراماسىنا جەڭىس سىيلاعان گولدى 27-مينۋتتا ماكسيم سامورودوۆ سوقتى. ونىڭ ايىپ الاڭى سىرتىنان جەرلەتە تەپكەن دوبى قوناقتار قاقپاسىنىڭ تورىندا تۋلادى.

قازاقستان پرەزيدەنتى قاسىم-جومارت توقايەۆ پەن كاسىبي بوكس جۇلدىزى گەننادي گولوۆكين قازاقستان قۇراماسىنىڭ ماتچىنە تاماشالادى.