تۇركيادا كەلەر جىلى العاشقى اتوم ستانسياسى ىسكە قوسىلادى

استانا. قازاقپارات - الەمدەگى ەنەرگەتيكالىق داعدارىس اتوم ونەركاسىبىن بارىنشا دامىتۋدى قاجەت ەتىپ وتىر. فرانسيا، وڭتۇستىك كورەيا، جاپونيا، كانادا مەن نيدەرلاندتا رەاكتور سالۋ باعدارلامالارى قايتا ىسكە قوسىلدى.

ال پولشا، ەگيپەت، ءۇندىستان، تايلاند پەن تۇركيا العاشقى اتوم ستانسياسىن سالۋدى قولعا العان. تۇركيا دەمەكشى، انادولۋ جەرىندەگى تۇڭعىش نىسان كەلەر جىلى جۇمىسىن باستاۋى ءتيىس. تۇركيادا «اككۋيۋ» اتوم ەلەكتر ستانسياسىنىڭ قۇرىلىسى قىزۋ ءجۇرىپ جاتىر. ول ەلدىڭ وڭتۇستىگىندەگى مەرسين پروۆينتسياسىندا ورنالاسادى. ءسويتىپ نىسان وزىنەن بولەك ماڭايداعى 10 ءوڭىردى ەلەكتر ەنەرگياسىمەن قامتاماسىز ەتۋى ءتيىس.

بۇل ايماقتاردا شامامەن 12 ميلليون تۇتىنۋشى بار. قۇرىلىس جۇمىستارى 5 جىلعا جۋىقتاپ قالدى. ەندى العاشقى بلوك كەلەر جىلى ىسكە قوسىلاتىن بولدى. جوبانىڭ كومەگىمەن اۋاعا بولىنەتىن كومىر قىشقىل گازىنىڭ مولشەرى 18 ميلليون تونناعا ازايۋى ءتيىس. ال ەكونوميكاعا پايداسى 6 جارىم ميلليارد دوللارعا باعالانىپ وتىر.

فرانسيادا دا اتومدىق رەاكتورلاردىڭ قۇرىلىسى جوسپارلانعان. 2050-جىلعا تامان سولاردىڭ التاۋى سالىنۋى ءتيىس. بۇدان بولەك بيلىك قازىر تاعى 8 قوندىرعىنىڭ قۇرىلىسىنا قاتىستى جوبالاردى قاراستىرىپ جاتىر. فرانسيا، بەيبىت اتوم سالاسىنداعى كوشباسشىلاردىڭ ءبىرى. سەكتورداعى قاۋىپسىزدىك پەن كادرلاردى دايارلاۋ جاعىنان وزىق ەلدەر قاتارىندا. مۇندا 56 اتومدىق رەاكتور بار. قازىر سولاردىڭ 40-ى جۇمىس ىستەپ تۇر. قالعاندارى جوندەۋدەن وتۋدە نە تەحنيكالىق قىزمەت كورسەتۋگە جىبەرىلگەن. قوندىرعىلار ەلدەگى ەلەكتر ەنەرگياسىنىڭ 70 پروتسەنتىن وندىرەدى.

قىتايدا دا اتوم ونەركاسىبىنىڭ قارقىنى ءوسىپ كەلەدى. ويتكەنى ول ەلەكتر ەنەرگياسىنىڭ ەڭ ءىرى تۇتىنۋشىسى سانالادى. سوندىقتان 2035-جىلى سالانىڭ ەنەرگەتيكالىق سەكتورداعى ۇلەسى 2 ەسە ارتۋى ءتيىس. سوندا جەرگىلىكتى اتوم ستانسيالارىندا ەلەكتر قۋاتىنىڭ 10 پروتسەنتى وندىرىلەتىن بولادى. ول ءۇشىن شىعىسىمىزداعى كورشى ەل جىل سايىن 6-8 بلوكتان ىسكە قوسىپ وتىرۋعا نيەتتى. قازىر مۇندا 50-دەن اسا ەنەرگوبلوك بار. تاعى 20-دان استامى سالىنىپ جاتىر.

www.24.kz