جەكەلەگەن تاۋارلار مەن قىزمەت تۇرلەرىنە قوسىمشا قۇن سالىعى قايتا سالىنۋى مۇمكىن

استانا. قازاقپارات - بۇرىن قوسىمشا قۇن سالىعىنان بوساتىلعان تاۋارلار، جۇمىستار مەن قىزمەتتەرگە قوسىمشا قۇن سالىعىن قايتا سالۋدى قاراستىرۋ قاجەت.

مۇنداي ۇسىنىس ۇلتتىق ەكونوميكا مينيسترلىگى جاريالاعان جاڭا سالىق ساياساتىنىڭ كونسۋلتاتيۆتىك قۇجاتىندا ايتىلعان، دەپ حابارلايدى قازاقپارات ءتىلشىسى.

«سالىستىرمالى تالداۋ كورسەتكەندەي، قازىرگى ۋاقىتتا قازاقستاندا قولدانىلاتىن %12 مولشەرىندەگى قوسىمشا قۇن سالىعىنىڭ (ق ق س) ءبىرىڭعاي ستاۆكاسى الەمدەگى ەڭ تومەن مولشەرلەردىڭ ءبىرى سانالادى. تاۋەلسىزدىكتىڭ العاشقى جىلدارىندا قازاقستاندا ق ق س مولشەرلەمەسى 28 پايىزدى قۇرادى. سونىمەن بىرگە جىلدار وتكەن سايىن مولشەرلەمە بىرتىندەپ تومەندەدى. مۇنداي تومەندەتۋدىڭ ماقساتى تاۋارلاردىڭ، جۇمىستاردىڭ، قىزمەتتەردىڭ كولەڭكەلى اينالىمىن ازايتۋ ارقىلى سالىق جيناۋ دەڭگەيىن ارتتىرۋ بولدى»، - دەپ ۇلتتىق ەكونوميكا مينيسترلىگى جاڭا سالىق كودەكسىنىڭ كونسۋلتاتيۆتىك قۇجاتىندا دەرەكتەر كەلتىرگەن.

الايدا ۆەدومستۆو قوسىمشا قۇن سالىعىنىڭ مولشەرىن كوتەرمەي، تەك بۇرىن وسى سالىقتان بوساتىلعان تاۋارلار ءتىزىمىن قايتا قاراۋ قاجەت ەكەنىن اتاپ وتكەن.

«جوعارىدا ايتىلعانداردى ەسكەرە وتىرىپ، قولدانىستاعى ق ق س مولشەرلەمەسىن %12 كولەمىندە ساقتاۋ جانە ق ق س تومەندەتىلگەن مولشەرلەمەسىنىڭ ورنىنا ەسەپتەلگەن ق ق س تومەندەتۋ قۇقىعىن ەنگىزۋ ۇسىنىلادى. سونىمەن قاتار بۇرىن بوساتىلعان تاۋارلارعا، جۇمىستارعا، قىزمەتتەرگە (مەديتسينا، ءبىلىم بەرۋ جانە تاعى دا باسقا) قوسىمشا قۇن سالىعىن سالۋدى قاراستىرۋ ماڭىزدى»، - دەپ ۇسىنىس جازىلعان كونسۋلتاتيۆتىك قۇجاتتا.