شىعىس قازاقستاندا قايدا بارىپ بالىق اۋلاۋعا بولادى

وسكەمەن. قازاقپارات - قايىققا ءمىنىپ، قارماق ۇستاۋدى جانىڭىز سۇيسە، شىعىس قازاقستاندا ءىشىڭىز پىسپايدى.

وزەن-كولگە باي ولكەدە بالىق اۋلايتىن جەر كوپ. وسى ماقالادا سىزدەردى سولاردىڭ بىرنەشەۋىمەن تانىستىرماقپىز، دەپ حابارلايدى قازاقپارات ءتىلشىسى.

زايسان- ەرتىس وبلىسارالىق باسسەيندىك بالىق شارۋاشىلىعى ينسپەكسياسىنىڭ مالىمەتىنە سۇيەنسەك، اۋەسقوي بالىقشىلار بەس كەلىگە دەيىن بالىقتى تەگىن اۋلاۋعا قۇقىلى. ول ءۇشىن ەرتىس وزەنىنە نەمەسە بۇقتىرما سۋ قويماسىنا بارۋعا بولادى.

سونىمەن قاتار شىعىس قازاقستان وبلىسى اكىمدىگىنىڭ قاۋلىسىمەن بالىق اۋلاۋعا رۇقسات ەتىلگەن رەكرەاتسيالىق ايماقتار بار. ءبىراق وندا دا وزىڭىزبەن بەس كەلىدەن ارتىق بالىقتى اكەتە المايسىز. وسىنداي ايماققا زايسان جانە سىبە كولدەرى جاتادى. ياعني، بۇل جەرلەردە ەشقانداي رۇقسات قۇجاتتارىن راسىمدەمەي، جولداما الماي-اق بالىق اۋلاۋعا رۇقسات ەتىلگەن.

سۋ ايدىندارىندا وزدەرىنە بەكىتىلگەن ۋچاسكەلەرى بار كومپانيالار دا اۋەسقوي بالىقشىلاردى قارسى الۋعا دايىن. ولارعا بارۋ ءۇشىن جولداما ساتىپ الۋ كەرەك.

سونىمەن قاتار قارماق پەن كەرەك- جاراقتى وزدەرى بەرەتىن، الاڭسىز بارىپ بالىق اۋلاپ قايتۋىڭىزعا بار مۇمكىندىكتى جاسايتىن ارنايى بازالار دا بار.

ماسەلەن، وسكەمەن قالاسىنان 34 شاقىرىمداي جەردەگى تاۋلى ءۇلبى اۋىلىنداعى دەمالىس ورنىنا اپتا سايىن، جۇما، سەنبى جانە جەكسەنبى كۇندەرى كەلۋگە بولادى. كولىك تۇراعىنىڭ اقىسى - 1000 تەڭگە. تولەم اۋلانعان بالىقتىڭ سالماعىنا قاراي ەسەپتەلەدى. فورەلدىڭ كەلىسى - 4500 تەڭگە. قارماقتى جالداۋ باعاسى - 1000 تەڭگە، بالىققا جەم - 800 تەڭگە. ال سۋ جاعاسىندا ۇستەلدى جالعا الۋ ءۇشىن ەكى ساعاتقا 2500 تەڭگە تولەيسىز.

سالىستىرمالى تۇردە ۇلان اۋدانى ساراتوۆكا اۋىلىنىڭ ماڭىنداعى بالىقشىلارعا ارنالعان دەمالىس ورنىنىڭ باعالارىنا كوز جۇگىرتىپ كورەلىك. مۇندا كولىك تۇراعى تەگىن. جۇمىس كۇندەرى دە اشىق بولادى. قارماقتى جالعا الۋ ءۇشىن 1000 تەڭگە تولەيسىز.

ال بالىقتىڭ باعاسىنا قاتىستى ايتار بولساق، سازاننىڭ كەلىسى 1000 تەڭگە، بەكىرە - 5000 تەڭگە، فورەل - 3500 تەڭگە. ىشىندە ىدىس- اياق پەن شاينەگى بار ءۇي- جايدى جالعا الۋ باعاسى تاۋلىگىنە 20 000-25 000 تەڭگە.