ەكولوگتەر ۇلكەن الماتى كولىنە باراتىن جولدى جاۋىپ، تۋريستەردى تەك ەكولوگيالىق كولىكپەن اپارۋدى ۇسىندى

الماتى. قازاقپارات - «جاسىل قۇتقارۋ» ەكولوگيالىق قوعامى ورمان شارۋاشىلىعى جانە جانۋارلار دۇنيەسى كوميتەتىنىڭ ءتوراعاسى، ىلە-الاتاۋ ۇلتتىق ساباعىنىڭ ديرەكتورى مەن الماتى قالاسىنىڭ اكىمىنە اشىق حات جولدادى.

وندا ىلە-الاتاۋ ۇلتتىق پاركىنىڭ ۇلكەن الماتى شاتقالىنداعى جاعداي ايتىلعان، دەپ حابارلايدى قازاقپارات ءتىلشىسى.

اشىق حاتتا قوعام مۇشەلەرى 2020-جىلى جوندەۋ جۇمىستارىنا بايلانىستى ۇلكەن الماتى كولىنە باراتىن جول جابىلعانىن، الايدا، بۇگىنگە دەيىن ەشقانداي جول جوندەۋ جۇمىستارى جاسالماعانىن جازدى.

«2020-جىلدىڭ ناۋرىز ايىندا بىرنەشە ۋچاسكەدە شۇڭقىرلار مەن وپىرىلىمدار پايدا بولۋىنا بايلانىستى ۇ ا ك- عا باراتىن جول جابىلدى. ول جولمەن ءجۇرۋ اۆتوكولىكتىڭ بارلىق ءتۇرى ءۇشىن قاۋىپتى بولدى. ءۇش جىل بويى تۋريستەر ۇ ا ك- عا تەك جاياۋ بارا الدى. سونداي-اق بۇل جىلدارى جولمەن ءجۇرۋ شەكتەۋلى بولدى، ياعني كولدىڭ جانىندا ورنالاسقان ۇيىمداردىڭ قىزمەتكەرلەرى عانا جۇرە الادى. اۆتوجول قازاۆتوجولعا قارايدى. ەكى جىل بويى كومپانيا جولدى قايتا قۇرۋ جوباسىن ازىرلەدى. 2022-جىلدىڭ كوكتەمىندە قوعامدىق تىڭداۋ ءوتتى. جوندەۋ جۇمىستارى 2 جىلدان سوڭ اياقتالۋى كەرەك بولاتىن. الايدا، وسى ۋاقىتقا دەيىن جول جوندەۋ جۇمىستارى ءتىپتى باستالعان دا جوق»، - دەپ جازادى قوعام مۇشەلەرى.

الايدا، جولدىڭ جابىلۋى قورشاعان ورتاعا پايدالى بولدى.

كوپ تۋريستەردىڭ، قوقىس پەن شۋدىڭ جوقتىعىن پايدالانىپ كولدىڭ جاعاسىنا جابايى جانۋارلار تۇسە باستاعان.

سونداي-اق شەكتەۋلى تۇردە بولسا دا تۋريزم اقىرىنداپ دامىپ جاتتى. جاياۋ تۋريستەر سوندا دا كول مەن ونىڭ اينالاسىنا كەلىپ ءجۇردى.

«2023-جىلى كۇتپەگەن جەردەن كولگە باراتىن جول اشىلدى. ال جول ءالى جوندەلمەگەن ءارى قاۋىپتى كۇيىندە قالا بەردى. ونىڭ ۇستىنە وتكەن جىلدار ىشىندە بەتكەيدە شۇڭقىرلار مەن وپىرىلعان جەرلەر مولايا تۇسكەن. كەي جەرلەردە جول ءبىر جولاققا دەيىن تارىلعان. ءبىر اپتا ىشىندە كولگە حاوس قايتا ورالدى. كەلۋشىلەر تار جولدا بىرنەشە ساعاتتىق ۇزىن-سونار كەپتەلىستە تۇرا باستادى. بىرنەشە كۇندە مۇندا بىرنەشە جول اپاتى بولدى، ادامدار زارداپ شەكتى. تاۋلى شاتقالدىڭ ەكوجۇيەسى كۇشتى رەكرەاتسيالىق جۇكتەمە، شۋ، اۆتوكولىك گازى مەن قوقىستان قايتا زارداپ شەگە باستادى. سونداي- اق مۇندا كوپ تۋريست ءۇشىن جاعداي جاسالماعان. ىلە الاتاۋى ءىنجۋ-مارجانى سانالاتىن ۇلكەن الماتى كولىنىڭ تاعدىرىنا بەي-جاي قارامايتىنداردىڭ اتىنان كولگە باراتىن جولدى شەكتەۋدى تالاپ ەتەمىز. «مەدەۋ-شىمبۇلاق» اۆتوجولىندا جاسالعانداي، ادامداردى قوعامدىق ەكولوگيالىق كولىكپەن كولگە تاسىمالداۋ قاجەت»، - دەپ مالىمدەدى «جاسىل قۇتقارۋ» ەكولوگيالىق قوعامىنىڭ مۇشەلەرى.

ەكولوگيالىق قوعام ۇلكەن الماتى كولىنىڭ جاناشىرلارىن ۇندەۋدى قولداۋعا شاقىرىپ، اركىم eotinish.kz پورتالى ارقىلى ءوز اتىنان حاتقا قول قويىپ، جىبەرە الاتىنىڭ حابارلادى.

ايتا كەتەيىك، ۇلكەن الماتى كولى - ىلە الاتاۋى مەن قازاقستاننىڭ باستى كورىكتى جەرلەرىنىڭ ءبىرى.

ول الماتىدان 15 شاقىرىم قاشىقتىقتا ىلە-الاتاۋ ۇلتتىق پاركىنىڭ اۋماعىندا ورنالاسقان.

2014-جىلى «الماتى قالاسىنىڭ شەكاراسىن وزگەرتۋ» تۋرالى پرەزيدەنت جارلىعىمەن ۇلكەن الماتى شاتقالىنىڭ ءبىر بولىگى قالانىڭ اكىمشىلىك شەكاراسىنا بەرىلگەن بولاتىن.