الماتى اكىمى اۆتوبۋستا زەينەتكەرگە اراشا تۇسكەن قىزدى ماراپاتتادى
«ءسىز تۇسىرگەن بەينەنى الەۋمەتتىك جەلىدەن كوردىم جانە كوپتەگەن الماتىلىق سياقتى بۇل وقيعا مەنى دە بەي-جاي قالدىرمادى. ءبىر جاعىنان، جولاۋشىلاردىڭ ارەكەتىنە قىنجىلدىم، ال ەكىنشىدەن، ءسىزدىڭ ارەكەتىڭىزگە ريزا بولىپ، وزىڭىزبەن ماقتاندىم. ەرەسەك ادامنىڭ ءوزى مۇنداي قادامعا بارىپ، كوپشىلىككە قارسى تۇرۋعا باتىلى بارماس ەدى. ءبىزدىڭ پرەزيدەنتىمىز ايتقانداي، ادىلەتتى قازاقستاندى جاۋاپتى ءارى ادال ازاماتتار عانا قۇرادى. ءسىز جوعارى جاۋاپكەرشىلىك تانىتتىڭىز. مۇنداي جاستار باردا، بولاشاققا دەگەن سەنىم زور»، - دەدى اكىم كەزدەسۋدە.
ايتا كەتەيىك، قامقور جاس ءوسپىرىمنىڭ ءىس-ارەكەتى قازاقستاندىقتاردىڭ جۇرەگىن جاۋلادى. الماتى قارجى-ەكونوميكالىق كوللەدجىنىڭ 2-كۋرس ستۋدەنتى ءوزىن قولداعاندارعا العىس ايتىپ، بارلىق ادامعا قامقورلىق كورسەتۋگە شاقىردى.
«ول ادامنىڭ ورنىندا مەنىڭ اتام بولۋى مۇمكىن ەدى دەپ ويلادىم. سول سەبەپتى باسقاشا ارەكەت ەتە المادىم. قارت ادامدى سوزبەن قورلاعانىنا، كەمسىتكەنىنە شىداي المادىم. ءوزىم اتاممەن بىرگە تۇرامىن، وعان ءاردايىم قامقورلىق، سىيلاستىق تانىتامىن. مەنىڭ تاربيەمدە ول ماڭىزدى ءرول اتقارادى. ومىردە مەيىرىمدى، قايىرىمدى جانداردىڭ ءبىر-بىرىنە كومەك قولىن سوزعانىن قالايمىن»، - دەيدى جاننۇر.
ەستەرىڭىزگە سالا كەتەيىك، الماتىنىڭ 119-مارشرۋتىندا قارت ادام توساپ سالىنعان قۇمىرانى بايقاۋسىزدا سىندىرىپ الدى. كەيبىر جولاۋشىلار ونى قورلاي باستاعاندا، جاس ءوسپىرىم زەينەتكەردى جاقتاپ، اۆتوبۋستىڭ ەدەنىن كوفتاسىمەن ءسۇرتتى. بەينەروليك الەۋمەتتىك جەلىلەردى تاراپ، جاننۇر نۇرجاندى قولداعان جۇزدەگەن پىكىر جازىلدى.
