استانادا مۇعالىم تاپشىلىعى قالاي شەشىلەدى
استانا كوممۋنيكاتسيالار قىزمەتىندە وتكەن بريفينگتە قالا اكىمىنىڭ ورىنباسارى ەسەت بايكەن پەداگوگيكالىق كادرلار قالاي تولىقتىرىلىپ جاتقانى تۋرالى ايتتى، دەپ حابارلايدى قازاقپارات ەلوردا اكىمدىگىنىڭ رەسمي سايتىنا سىلتەمە جاساپ.
بۇگىنگى تاڭدا قالالىق ءبىلىم بەرۋ ۇيىمدارىنىڭ تاربيە قىزمەتىندە 23533 پەداگوگ قىزمەت ەتەدى. بالالار سانىنىڭ وسۋىنە جانە «جايلى مەكتەپتەردىڭ» سالىنۋىنا بايلانىستى 2026-2027 وقۋ جىلىنا قاراي 4 مىڭنان استام مۇعالىم قاجەت بولادى.
«بۇل ماسەلەنى شەشۋ ءۇشىن سوڭعى جىلدارى قالا اكىمدىگى پەداگوگيكالىق ماماندىقتارعا مەملەكەتتىك ءبىلىم بەرۋ تاپسىرىسىن بەردى. بيىل پەداگوگيكالىق ماماندىقتارعا 900 دەن استام گرانت ءبولىندى. سوڭعى 4 جىلدا 3000 عا جۋىق گرانت ءبولىندى، ونىڭ ىشىندە اكىم گرانتى بويىنشا ءبىلىم العان پەداگوگيكالىق جوعارى وقۋ ورىندارىنىڭ 132 تۇلەگى بيىل ەلوردا مەكتەپتەرىندە جۇمىسىن باستادى»، - دەدى ەسەت بايكەن.
