جانات ەشماعامبەتوۆ وسكەمەن تۇرمەسىنەن تاراعان سۋرەت تۋرالى: تابىلعان تەلەفون سەرىك كۇدەبايەۆتىكى ەمەس

استانا. قازاقپارات - قىلمىستىق-اتقارۋ جۇيەسى كوميتەتىنىڭ ءتوراعاسى جانات ەشماعامبەتوۆ وسكەمەن تۇرمەسىنەن الەۋمەتتىك جەلىگە تاراعان سۋرەت تۋرالى پىكىر ءبىلدىردى، دەپ حابارلايدى قازاقپارات ءتىلشىسى.

«وسكەمەندەگى بۇرىنعى قۇقىق قورعاۋ قىزمەتكەرلەرىنە ارنالعان قاۋىپسىزدىگى ورتا دەڭگەيدەگى 22№ مەكەمەدەگى جاعدايعا كەلسەك، بەينەجازبانى كوردىك جانە قىزمەتتىك تەرگەۋ جۇرگىزدىك. ىشكى ءتارتىپ ەرەجەلەرى بويىنشا، بارلىق سوتتالۋشىلاردىڭ ءوزى ورنالاسقان مەكەمەنىڭ قاۋىپسىزدىك دەڭگەيىنە قاراي قىسقا مەرزىمگە نەمەسە ۇزاق مەرزىمگە تۋىستارىمەن كەزدەسۋگە قۇقىعى بار. وسى كەزدەسۋلەر كەزىندە تۋىستارىنان سالەمدەمەلەر قابىلداي الادى. ونىڭ ىشىندە ازىق-تۇلىك تە بار. بۇل جاعدايدا سوتتالۋشىلار تۋىستارىمەن كەزدەسۋدە ازىق-تۇلىك العان. سۋرەتتە ۇستەلدىڭ ۇستىندە نە تۇرعانىن كوردىڭىز دەپ ويلايمىن. ساعات 8.00 دەن كەيىنگى بوس ۋاقىتتارىندا جينالىپ، تاماق ىشكەن»، - دەدى جانات ەشماعامبەتوۆ.

سونداي-اق، ول داستارحان باسىنداعىلاردى سۋرەتكە كىم تۇسىرگەنى انىقتالعانىن ايتتى.

«ءبىز انىقتاعان زاڭ بۇزۋ ارەكەتى - ۇيالى تەلەفوننىڭ بولۋى جانە بەينەكامەرالاردىڭ وبەكتيۆىن جاۋىپ تاستاۋ. مەكەمەدە مۇندايعا قاتاڭ تىيىم سالىنعان.

كىمنىڭ سۋرەتكە تۇسىرگەنىن انىقتادىق. بۇل سوتتالۋشىلاردىڭ ءبىرى بولىپ شىقتى. تەلەفوندى تاۋىپ، تاركىلەدىك. تەلەفون ۇستاعان ادام جازالاۋ مەكەمەسىنىڭ رەجيمىن قاساقانا بۇزۋشى رەتىندە تارتىپتىك يزولياتورعا قامالدى. تىيىم سالىنعان قۇرالدىڭ قالاي كىرگىزىلگەنىن تەكسەرىپ جاتىرمىز»، - دەدى كوميتەت ءتوراعاسى.

ونىڭ ايتۋىنشا، سۋرەت تۇسىرۋگە قولدانىلعان تەلەفون سەرىك كۇدەبايەۆتىكى ەمەس.

«ءبىز تەكسەرۋ جۇرگىزدىك. اكوگول ىشىمدىگى بولماعان. ۇستەل ۇستىندە، ولار تۇتىنعان تاماقتىڭ ىشىندە تىيىم سالىنعان زاتتار بولماعان»، - دەدى جانات ەشماعامبەتوۆ.

بۇعان دەيىن الماتى وبلىستىق پوليتسيا دەپارتامەنتىنىڭ بۇرىنعى باستىعى، قاڭتار وقيعاسىنان كەيىن سوتتالعان سەرىك كۇدەبايەۆتىڭ وسكەمەن تۇرمەسىندەگى سۋرەتى جەلىگە تاراپ كەتۋىنە بايلانىستى قىزمەتتىك تەكسەرۋ باستالعانىن جازعان ەدىك.