جوعارى اۋديتورلىق پالاتانىڭ قۇزىرەتى قالاي كۇشەيتىلدى - پرەزيدەنت جارلىعى
قۇجاتتا پالاتاعا جەرگىلىكتى بيۋدجەتتەردىڭ قاراجاتىنا اۋديت جۇرگىزۋگە نەگىز بولاتىن سەبەپتەردىڭ قاتارى كەڭەيتىلگەن. ناقتى ايتساق، جوعارى اۋديت پالاتاسى بيۋدجەتتىڭ بۇل تۇرىنە مەملەكەتتىك ورگانداردىڭ، تەكسەرۋ كوميسسيالارىنىڭ، جەكە جانە زاڭدى تۇلعالاردىڭ جولدانىمدارى بويىنشا، سونداي- اق قۇقىق قورعاۋ ورگاندارىنىڭ اقپاراتى نەگىزىندە اۋديت جۇرگىزە الادى.
ءبىراق اۋديت جۇرگىزۋ تۋرالى قابىلدانعان شەشىمدى پرەزيدەنت اكىمشىلىگىنە حابارلاپ، پالاتا وتىرىسىندا داۋىسقا سالۋ ارقىلى بەكىتەدى.
پالاتا مەملەكەتتىك اۋديت پەن قارجىلىق باقىلاۋ ورگاندارى جۇرگىزگەن ءاۋديتتىڭ قورىتىندىلارىن قايتا قاراۋعا قۇزىرەت الىپ وتىر. ول ءۇشىن اۋديت ماتەريالى بويىنشا سوت شەشىمى كۇشىنە ەنبەگەن بولۋى كەرەك. اۋديت قورىتىندىلارىن قايتا قاراۋ تۋرالى تاپسىرمانى پالاتاعا پەرزيدەنت پەن پرەزيدەنت اكىمشىلىگى بەرە الادى.
جارلىققا سايكەس، پالاتا مەملەكەتتىك اۋديت جانە قارجىلىق باقىلاۋ ماتەريالدارىن ءبىرىڭعاي ارنايى دەرەكقوردا جاريالاۋعا قۇزىرەتتى. الايدا پالاتا قارجى نارىعى مەن قارجى ۇيىمدارىن رەتتەيتىن، باقىلاۋ جانە قاداعالاۋ جۇرگىزەتىن ۋاكىلەتتى ورگاننىڭ زاڭمەن قورعالاتىن قۇپياسى ماتەريالدارىن جاريالاي المايدى.
قۇجاتتا جوعارى اۋديتورلىق پالاتا ۇلتتىق بانك پەن زەينەتاقى قورىن قالاي باقىلاي الاتىنى ايتىلعان. ول ءۇشىن پالاتاعا پرەزيدەنتتىڭ كەلىسىمىن الۋ كەرەك نەمەسە پرەزيدەنتتىڭ وزىنەن تىكەلەي تاپسىرما ءتۇسۋى قاجەت.
سونداي- اق پالاتا تەكسەرۋ كوميسسيالارى مەن ىشكى مەملەكەتتىك اۋديت جونىندەگى ۋاكىلەتتى ورگاننىڭ، ىشكى اۋديت قىزمەتتەرى جۇرگىزگەن مەملەكەتتىك اۋديتتەردىڭ ستاندارتقا ساي جۇرگىزىلۋىن باقىلاۋعا حاقىلى ەكەنى ايتىلعان.
