ەندى زيراتتا بوس ورىننىڭ بار-جوعىن اكىمدىكتىڭ سايتىنان بىلۋگە بولادى

استانا. قازاقپارات - جەرلەۋ جانە زيراتتاردى كۇتىپ ۇستاۋدىڭ جاڭا ەرەجەلەرى بەكىتىلمەك، دەپ حابارلايدى قازاقپارات ءتىلشىسى.

«جەرگىلىكتى اتقارۋشى ورگاندار زيرات قورىمى ورنالاسقان جانە ولارعا ارنالعان ورتاق پايدالانۋداعى جەردەن ءاربىر قايتىس بولعان ازاماتتى نەمەسە تۇرعىلىقتى جەرى بەلگىسىز ادامدى جەرلەۋ ءۇشىن كەمىندە 6 م2 بولاتىن، ءبىراق 8,1 م2 اسپايتىن جەر ۋچاسكەسىن تەگىن بولەدى. زيرات قورىمىنىڭ اۋماعى زيراتتار قاتارىنا بولىنەتىن جانە اۆتوموبيل كولىگىنە ارنالعان وتپە جولدارمەن جانە زيرات ۋچاسكەلەرىنە وتەتىن جولدارمەن جايلاستىرىلاتىن ۋچاسكەلەردەن تۇرادى»، - دەپ جازىلعان اشىق ن ق ا پورتالىندا جاريالانعان ۇلتتىق ەكونوميكا ءمينيسترىنىڭ بۇيرىق جوباسىندا.

سونىمەن قوسا جاڭا تالاپقا ساي، ەندى استانا، الماتى، شىمكەنت قالالارى مەن 17 وبلىستىڭ اكىمدىگى مىنا قىزمەتتەردى كورسەتۋگە مىندەتتەلەدى:

- زيراتتارعا ارنالعان جەر ۋچاسكەلەرىن ەسەپكە الۋ جانە تىركەۋ دەرەكتەرىن (مالىمەتتەرىن) جيناقتايدى؛

- جەرلەۋگە، زيرات قورىمدارىن كۇتىپ ۇستاۋعا جانە ولارعا قىزمەت كورسەتۋگە شارت تالاپتارىنىڭ ساقتالۋىن باقىلايدى؛

- زيرات قورىمىنىڭ بوس ەمەس جانە بوس ۋچاسكەلەرى بويىنشا وزەكتى اقپاراتتى جەرگىلىكتى اتقارۋشى ورگاننىڭ رەسمي ينتەرنەت- رەسۋرسىندا ورنالاستىرادى.

بۇيرىق جوباسى 21-قىركۇيەككە دەيىن كوپشىلىك تالقىسىندا بولادى.