جول اپاتى بولعان جەردەن قاشىپ كەتكەندەرگە قانداي جازا قولدانىلادى؟
قانداي جازا قولدانىلادى؟
استانادا جىل باسىنان بەرى 22406 جول اپاتى بولدى. ونىڭ ىشىندە 2817 جاعدايدا جۇرگىزۋشىلەر جول اپاتى بولعان جەردەن قاشىپ كەتكەن. الايدا بارلىعى انىقتالىپ، جاۋاپقا تارتىلعان.
«بۇل جۇرگىزۋشىلەر جاعدايدىڭ قانشالىق كۇردەلى ەكەنىن تۇسىنبەيدى. اسىعىستىق تانىتىپ، وزگە كولىكتى سوعىپ وتكەنىن بايقاماي، وقيعا ورنىنان جاسىرىنۋعا تىرىسادى. وسىلايشا، ءوز ارەكەتىنىڭ اۋىر زارداپتارعا اكەلەتىنىن ەسكەرمەيدى. جول اپاتى بولعان جەردەن كەتىپ قالعانى ءۇشىن اكىمشىلىك جاۋاپكەرشىلىك قاراستىرىلعان، ال زارداپ شەككەندەر نەمەسە قازا تاپقاندار بولعان جاعدايدا قىلمىستىق جازا كوزدەلەدى»، - دەلىنگەن حابارلامادا.
بيىلعى سەگىز ايدا ەلوردادا جول اپاتىنا قاتىسى بولعانى ءۇشىن 28 كولىك يەسى اكىمشىلىك قۇقىقبۇزۋشىلىق تۋرالى كودەكسىنىڭ 610-بابىنىڭ 1-بولىگى بويىنشا جۇرگىزۋشى كۋالىگىنەن ايىرىلعان. سونىمەن قاتار، 24 جۇرگىزۋشى اكىمشىلىك قۇقىقبۇزۋشىلىق تۋرالى كودەكسىنىڭ 611-بابىنىڭ 2-بولىگى بويىنشا وقيعا ورنىنان كەتىپ قالۋىنا بايلانىستى كولىك باسقارۋ قۇقىعىنان ايىرىلعان. ماسەلەن، 4- تامىزدا تۇرعىن ۇيلەردىڭ ءبىرىنىڭ اۋلاسىندا كولىك جۇرگىزۋشىسى ارتقا قاراي قوزعالىپ جاتقان كەزدە ەكىنشى كولىكتى ءتۇيىپ ءوتىپ، يەسىنىڭ جوقتىعىن پايدالانىپ، وقيعا ورنىنان قاشىپ كەتكەن. ونىڭ ارەكەتى بەينەباقىلاۋ كامەراسىنا ءتۇسىپ قالعان. از ۋاقىت ىشىندە پوليتسيا قۇقىقبۇزۋشىنى انىقتاپ، 241500 تەڭگە كولەمىندە ايىپپۇل سالعان.
جول اپاتىنا سەبەپ بولعان جاعدايدا نە ىستەۋ كەرەك؟
«ەگەر ءسىز جول-كولىك وقيعاسىنا سەبەپكەر بولساڭىز نەمەسە باسقا بىرەۋدىڭ كولىگىن سوعىپ كەتسەڭىز، اۆتوكولىكتى توقتاتىپ، وقيعا ورنىنان قوزعالماڭىز، جارىق بەلگىسىن قوسىپ، جول اپاتى تۋرالى ارنايى بەلگىنى قويىڭىز. سونىمەن قاتار، بولعان جاعدايدى پوليتسياعا حابارلاۋدى ۇمىتپاڭىز»، - دەدلىنگەن استانا قالاسىنىڭ پوليتسيا دەپارتامەنتى حابارلاماسىندا.
