ەلىمىزدە جەرگە زەرتتەۋ جۇرگىزەتىن مەملەكەتتىك ينستيتۋت قۇرىلدى

استانا. قازاقپارات - اۋىل شارۋاشىلىعى مينيسترلىگىنىڭ جانىنان جەرگە ەكونوميكالىق باعالاۋ جۇرگىزىپ، مونيتورينگ جاسايتىن ينستيتۋت قۇرىلدى.

پرەمەر- مينيستر ءاليحان سمايىلوۆ ءتيىستى ۇكىمەت قاۋلىسىنا قول قويدى، دەپ حابارلايدى قازاقپارات ءتىلشىسى.

«اۋىل شارۋاشىلىعى مينيسترلىگى جەر رەسۋرستارىن باسقارۋ كوميتەتىنىڭ «جەرلەرگە زەرتتەپ - قاراۋ جۇمىستارىن جۇرگىزۋ جونىندەگى مەملەكەتتىك ينستيتۋت» شارۋاشىلىق جۇرگىزۋ قۇقىعىنداعى رەسپۋبليكالىق مەملەكەتتىك كاسىپورنى قۇرىلسىن. كاسىپورىننىڭ مىندەتى - جەردى ەكونوميكالىق باعالاۋ، وعان مونيتورينگ جۇرگىزۋ، توپىراقتى زەرتتەۋ، گەوبوتانيكالىق، اگروحيميالىق زەرتتەۋلەردى جانە توپىراقتى باعالاۋدى جۇرگىزۋدى قامتيتىن جەرلەردىڭ ساپاسىن ەسەپكە الۋ»، - دەلىنگەن ءاليحان سمايىلوۆ قول قويعان ۇكىمەت قاۋلىسىندا.

سونىمەن قاتار، ءتيىستى قاۋلىمەن اۋىل شارۋاشىلىعى مينيسترلىگىنە تىكەلەي باعىناتىن مىنا قۇرىلىمدار ەندى جەر رەسۋرستارىن باسقارۋ كوميتەتىنە بەرىلدى:

- رەسپۋبليكالىق اگروحيميا قىزمەتىنىڭ عىلىمي- ادىستەمەلىك ورتالىعى؛

- ايماقتىق گيدروگەولوگيالىق- مەليوراتسيالىق ورتالىعى؛

- وڭتۇستىك قازاقستان گيدروگەولوگيالىق- مەليوراتسيالىق ەكسپەديتسياسى؛

- قىزىلوردا گيدروگەولوگيالىق- مەليوراتسيالىق ەكسپەديتسياسى.

قاۋلى قول قويىلعان كۇننەن، ياعني 6- قىركۇيەكتەن باستاپ كۇشىنە ەندى.