بانك عيماراتىنا شابۋىلداۋشى اپكەسىنىڭ ەمىنە اقى تالاپ ەتتى - كۋاگەر
«18- ماۋسىم، تۇسكى اس ۋاقىتى بولدى. ماعان كەزەكشى قوڭىراۋ شالىپ، كەپىلگە الۋ تۋرالى قوڭىراۋ تۇسكەنىن ايتتى. مەن ءوز كولىگىممەن وقيعا ورنىنا باردىم. جول- جونەكەي قانشا ادام كەپىلگە الىنعانىن انىقتادىم، 10-15 مينۋت ىشىندە جەتتىم. وقيعا ورنىندا پوليتسيا قىزمەتكەرلەرى جانە كوپ ادام بولدى. ءبىرازدان سوڭ مەن وق وتپەيتىن جيلەتپەن (برونەجيلەت) اليحانمەن (ايىپتى) بايلانىس ورناتۋ ءۇشىن باق وكىلى رەتىندە عيماراتقا كىردىم. سەنىمگە كىرۋ ءۇشىن ءاليحان وق وتپەيتىن جيلەتتى شەشۋدى ءوتىندى، مەن جيلەتتى شەشىپ تاستادىم. تەرگەۋ مالىمەتتەرىنە سايكەس، از قامتىلعان جانە مۇگەدەك بالالارعا بانك اكسيالارىن اۋدارۋ تۋرالى تالاپتاردان باسقا، ول اپكەسىنىڭ ەمدەلۋىنە قارجىلىق كومەك كورسەتۋدى سۇراعان»، - دەدى سوت بارىسىندا كۋاگەر.
ايتا كەتەيىك، سوت وتىرىسى الدىندا سۋديا كۋاگەرلەر مەن زارداپ شەككەندەرگە قاتىستى جەكە مالىمەتتەردى (اتى- ءجونى، قىزمەتى، ت. ب. ) جاريالاۋعا تىيىم سالدى. سوت وتىرىسى بۇگىن ساعات 15:00 دە جالعاسادى.
ەسكە سالا كەتسەك، بيىل 18- ماۋسىمدا قارۋلانعان ەر ادام ەلورداداعى Kaspi بانك عيماراتىندا بىرنەشە كىسىنى تۇتقىندا ۇستاپ وتىردى.
اراعا ۋاقىت سالىپ اتالعان بانكتىڭ باسپا ءسوز قىزمەتى عيماراتتا كليەنتتەردىڭ جوقتىعىن جانە پوليتسيا قىزمەتكەرلەرىنىڭ كۇدىكتىمەن كەلىسسوز جۇرگىزىپ جاتقانىن مالىمدەدى.
وقيعا ورنىنا ىشكى ىستەر ءمينيسترى مارات احمەتجانوۆ باردى.
پوليسيا قىزمەتكەرلەرى كەپىلدەگى ازاماتتاردى بوساتىپ الدى.
23-تامىزدا Kaspi Bank عيماراتىنا جاسالعان شابۋىل بويىنشا قىلمىستىق ءىس سوتقا جەتكەنىن حابارلاعان ەدىك.
ايتا كەتەيىك، 29-تامىزدا وتكەن العاشقى سوت وتىرىسىندا Kaspi Bank عيماراتىن باسىپ العان جىگىت ونىڭ الدىندا ءوزىن ءولتىرۋ ءۇشىن ءدارى ىشكەنى بەلگىلى بولدى.
