بانكتەردىڭ وپەراتسيالاردان تاپقان پايداسىنا سالىق سالۋدى قاراستىرامىز - سەنات ءتوراعاسى

استانا. قازاقپارات - «قازاقستاندا جۇمىس ىستەيتىن بانكتەردىڭ وپەراتسيالار ارقىلى تاۋىپ جاتقان پايداسىنا سالىق سالۋ ماسەلەسىن قاراستىرامىز».

Qazaqstan ۇلتتىق تەلەارناسىنىڭ «باس تاقىرىپ» باعدارلاماسىنا سۇحبات بەرگەن پارلامەنت سەناتىنىڭ ءتوراعاسى ماۋلەن اشىمبايەۆ وسىلاي ايتتى، دەپ حابارلايدى قازاقپارات ءتىلشىسى.

«بۇگىنگى كۇنى بارلىق بانك نەسيەلەرىنە قارايتىن بولساق، سونىڭ % 34- ى - تۇتىنۋشىلىق كرەديتتەرگە بەرىلگەن. شاعىن جانە ورتا بيزنەسكە بەرىلگەن نەسيەلەردىڭ ۇلەسى % 25-26 كولەمىندە. دەمەك، بانكتەرگە ەكونوميكانىڭ ناقتى سالالارىنا اقشا سالعانشا، قاراپايىم ازاماتتارعا تۇتىنۋشىلىق نەسيە بەرگەن ءتيىمدى، پايىزى كوپ جانە تاۋەكەلى دە از. نەگە بۇلاي بولىپ وتىر؟ سەبەبى، كاسىپكەرلەرگە نەسيە بەرگەنگە قاراعاندا، مەملەكەتتىڭ قۇندى قاعازدارىن الا سالعان جەڭىلدەۋ، پايىزى دا وتە جوعارى. ماسەلەن، ۇلتتىق بانك نوتالارىنا جىلدىق % 14,5 تولەنەدى. مۇندا تاۋەكەل جوق. پرەزيدەنت بۇل ساياساتتى وزگەرتۋ قاجەتتىگىن ايتتى. سول سەبەپتى، بانكتەردىڭ وپەراتسيالار ارقىلى تاۋىپ جاتقان پايداسىنا سالىق سالۋ ماسەلەسىن قاراستىرامىز»، - دەپ ءمالىم ەتتى ماۋلەن اشىمبايەۆ.

سەنات ءتوراعاسى اتاپ وتكەندەي، سالىق سالۋدى ەنگىزۋ ءۇشىن الدىمەن ءتيىستى زاڭدارعا وزگەرىس ەنگىزىلەدى. بۇل باعىتتاعى كەيبىر زاڭدار پارلامەنتتىڭ قاراۋىنا تۇسسە، ال قالعانى ەندى ەنگىزىلەدى.