كارانتيندەگى اۋىل: اقمولا وبلىسىندا تۇينەمەنىڭ قايدان شىققانى انىقتالىپ جاتىر
قازىرگى كەزدە جاعداي تۇراقتى، الاڭداۋعا ەش نەگىز جوق، ماماندار تۇينەمەنىڭ قايدان شىققانىن انىقتاپ جاتىر. بۇل تۋرالى وبلىستىق ۆەتەريناريا باسقارماسىنىڭ باسشىسى تالعات ءجۇنىسوۆ ءمالىم ەتتى، دەپ حابارلايدى قازاقپارات ءتىلشىسى.
باسقارما باسشىسىنىڭ ايتۋىنشا، تۇينەمەنىڭ (ءسىبىر جاراسى) تارالۋىنا بايلانىستى ءتۇرلى نۇسقا بار. ولاردىڭ بارلىعىن جوققا شىعارۋعا بولمايدى.
«جۋىردا ب ا ق-تا تۇينەمەنىڭ بورسىق ارقىلى تاراعانى تۋرالى اقپارات شىقتى. ءبىز ونى جوققا شىعارمايمىز. ينفەكسيا كوزى بورسىق، ءشوپ جانە استىق بولۋى مۇمكىن. بۇلاردىڭ بارلىعىنان سىنامالار الىنىپ، زەرتتەلىپ جاتىر. ءبىراق ازىرگە ناقتى اقپارات جوق»، - دەيدى تالعات ءجۇنىسوۆ قازاقپارات ءتىلشىسىنىڭ ساۋالىنا.
باسقارما باسشىسى اتاپ وتكەندەي، 30 ءىرى قاراعا قاراسان ءتيىپ، 536 كەلى ەت تاركىلەندى. اۋرۋ مال مەن ەت مال قورىمىندا ورتەۋ جولىمەن جويىلدى.
«كارانتيندىك شارالاردىڭ ناتيجەسىندە اۋىلداعى وزگە ءىرى قارانىڭ قاراسانعا شالدىعۋ دەرەگى تىركەلگەن جوق. كارانتين تامىزدىڭ 31 دە جاريالانىپ، قىركۇيەكتىڭ 14 ىندە الىنادى. ازىرگە الاڭداۋعا ەش نەگىز جوق»، - دەپ تولىقتىردى تالعات ءجۇنىسوۆ.
ايتا كەتسەك، بۇدان بۇرىن اقمولالىق دارىگەرلەر تۇينەمە جۇقتىرعان ناۋقاستاردىڭ جاعدايى تۋرالى ايتقان ەدى.
