قازاقستان مەن تۇركيا اراسىندا كەدەندىك باقىلاۋ راسىمدەرى جەڭىلدەيدى

استانا. قازاقپارات - بۇگىن سەناتتىڭ جالپى وتىرىسىندا «قازاقستان ۇكىمەتى مەن تۇركيا ۇكىمەتى اراسىنداعى اقپارات الماسۋدى ۇيىمداستىرۋ جانە كەدەندىك باقىلاۋ راسىمدەرىن وڭايلاتۋ تۋرالى كەلىسىمدى راتيفيكاتسيالاۋ تۋرالى» زاڭى ماقۇلداندى، دەپ حابارلايدى قازاقپارات ءتىلشىسى.

كەلىسىمگە 2022 -جىلعى 10- مامىردا مەملەكەت باسشىسىنىڭ انكاراداعى ساپارى اياسىندا قول قويىلدى.

تۇركيا قازاقستاننىڭ نەگىزگى ساۋدا- ەكونوميكالىق ارىپتەستەرىنىڭ ءبىرى سانالادى، ياعني ساۋدا قارىم- قاتىناسىندا ەۋرازيالىق ەكونوميكالىق وداققا مۇشە مەملەكەتتەردى ەسەپكە الماعاندا، 3-ورىندا تۇر. كەلىسىمدى راتيفيكاتسيالاۋ ەكى مەملەكەتتىڭ اراسىندا وتكىزىلەتىن تاۋارلار مەن كولىكتەر بويىنشا مالىمەتتەردى ەلەكتروندىق الماسۋ ارقىلى كەدەندىك باقىلاۋدىڭ تيىمدىلىگىن ارتتىرۋعا جانە ونى اتقارۋ مەرزىمدەرىن قىسقارتۋعا باعىتتالعان. بۇل تۇرعىدا كەدەندىك باقىلاۋ راسىمدەرىن وڭايلاتۋ جانە سىرتقى ەكونوميكالىق ساۋدادا جۇرگەندەر ءۇشىن نەعۇرلىم قولايلى جاعداي جاساۋ ەسكەرىلگەن، - دەدى سەناتور بەكبولات ورىنبەكوۆ.

قارالىپ وتىرعان زاڭنىڭ ەرەجەلەرىنە سايكەس، وتكىزۋ پۋنكتەرىندە شەكارادان ءوتۋدىڭ باسىم ءتارتىبى جۇزەگە اسىرىلادى. كەدەندىك باقىلاۋ ۋاقىتىن قىسقارتۋ ماقساتىندا ءتيىستى قاداعالاۋ ءىس- شارالارى جەڭىلدەتىلەدى. سونىمەن قاتار وتكىزۋ پۋنكتەرىندە كەدەندىك تەكسەرۋ ءتارتىبى جەڭىلدەيدى.

بۇعان قوسا، بەرىلەتىن مالىمەتتەردىڭ قاۋىپسىزدىگىن قامتاماسىز ەتۋ ماقساتىندا ەكى ەلدىڭ ۋاكىلەتتى ورگاندارى اقپارات الماسۋدىڭ تەحنيكالىق شارتتارىن جەكە ازىرلەيدى. تەحنيكالىق شارتتار ازىرلەنىپ، پيلوتتىق جوبانى ىسكە اسىرۋ باستالادى. بۇل پروتسەسس اياقتالعاننان كەيىن، ەكى ەلدىڭ كەدەن ورگاندارى مالىمەتتەرمەن تۇراقتى نەگىزدە الماسۋدى قولعا الادى. زاڭ قازاقستان مەن تۇركيا اراسىنداعى ىنتىماقتاستىقتىڭ تيىمدىلىگىن ارتتىرۋعا باعىتتالعان. قۇجاتتى قابىلداۋ، تەرىس قۇقىقتىق جانە الەۋمەتتىك- ەكونوميكالىق سالدارعا اكەپ سوقپايدى. كەلىسىمدى ىسكە اسىرۋ ماقساتىندا مەملەكەتتىك بيۋدجەتتەن قارجى شىعىندارىن تالاپ ەتپەيدى. اتالعان قۇجات جان- جاقتى تالقىلاندى. سەناتتىڭ تۇراقتى كوميتەتتەرىنەن ەسكەرتۋلەر مەن ۇسىنىستار تۇسكەن جوق، - دەدى سەناتور.