ورتا ازيادا مىلتىعى كوپ حالىق، قازاقتار- ورىس وفيتسەرلەرى

استانا. قازاقپارات - كينولاردا، قازاق باتىرلارىنىڭ ورىس ارمياسىنا جالاڭ قىلىش، ساداقپەن شاۋىپ بارا جاتقانىن كوپ كورەمىز عوي. وسى كورىنىس تۇبىرىمەن قاتە. قازاق اراسىندا بولعان پولياك، ورىس وفيتسەرلەرى - ورتا ازيادا مىلتىعى كوپ حالىق، قازاقتار، - دەگەندى ءجيى جازادى.

ال، استراحان گۋبەرناتورى ا. ۆولىنسكي: «ەگەر قازاقتار شاپسا، قالماقتاردىڭ قۇرىپ كەتۋى مۇمكىن. سەبەبى ولار قازاقتان قورقادى، قازاقتىڭ 5-6 جۇزىنە قالماقتىڭ 5-6 مىڭى قارسى تۇرا المايدى. قازاقتاردىڭ ساداقتان كورى مىلتىعى كوپ» دەگەن دەرەگى دە، ويلاندىرادى.

سونىمەن، قازاق اسكەرى قانداي مىلتىق تۇرلەرىن تۇتىندى؟ ەسكە ءتۇسىرىپ كورەيىك:

قازاق اسكەرىنىڭ مىلتىقتارى:

1) شيتى مىلتىق. (كەڭ تارالعان، پىلتەمەن وقتالاتىن قارۋ)

2) قارا مىلتىق (2 ادام يىعىنا اسىپ، بىرەۋى اتادى. كارتەچپەن اتىلاتىندىقتان توپتى جايراتىپ جىبەرەتىن بولعان)

3) قوزىكوش (تەمىر ۇڭعىسى ىشىنەن سپيرال كەيىپتە ويىلعاندىقتان، وق شىر اينالىپ الىسقا ۇشادى ءارى ترەاكتورياسى ءتۇپ- ءتۇزۋ بولادى. )

4) كۇلدىر- ماماي (وتە الىسقا اتاتىن اۋىر مىلتىق. كەنەسارى حان ورىستىڭ قاراۋىلىن 1,5 شاقىرىم الىستان تۇرىپ، اتىپ قۇلاتقانى تۋرالى دەرەكتەر بار)

5) اقبەرەن (مەرگەندەردىڭ مىلتىعى)

6) شامعال («شامعالدى قويدى قاتارعا، جيىلعان كوپكە اتارعا» دەپ كەلەتىن جىر جولدارىنا قاراعاندا، جاۋدى جۋساتىپ سالۋ ءۇشىن بىرنەشەۋىن قاتار قوياتىن، تەمىر پىتىرامەن اتاتىن اۋىر مىلتىق ءتۇرى)

قازاق اسكەرىنىڭ ارتيلەريا تۇرلەرى:

1) زەڭبىرەك (اۋىر ارتيلەريالىق قارۋ. قامال بۇزۋعا، قالىڭ اسكەردى تالقانداۋعا پايدالانادى)

2) تيۋفياك (قولمەن الىپ جۇرۋگە ىڭعايلى شاعىن زەڭبىرەك)

3) جەزايىل (تۇيەگە ارتىلعان زەڭبىرەك)

...

نۇربەك بەكباۋ