بولات جامىشيەۆ مەملەكەت باسشىسىنا «قازاقستان حالقىنا» قورىنىڭ جۇمىسى تۋرالى باياندادى

استانا. قازاقپارات - مەملەكەت باسشىسى «قازاقستان حالقىنا» قورىنىڭ ءتوراعاسى بولات جامىشيەۆتى قابىلدادى، دەپ حابارلايدى اقوردانىڭ باسپا ءسوز قىزمەتى.

پرەزيدەنتكە قور 2022-جىلى قاڭتاردا قۇرىلعان ۋاقىتتان بەرى قايىرىمدىلىق جاساۋدىڭ تۇراقتى مودەلىن ۇلتتىق اۋقىمدا قالىپتاستىرعانى تۋرالى مالىمەت بەرىلدى.

قور اشىقتىق، ەسەپتىلىك، زاڭدىلىق جانە تۇراقتىلىق سەكىلدى قوعامدىق قارجىنى باسقارۋدىڭ نەگىزگى قاعيداتتارىن ساقتايدى جانە ەلىمىزدەگى قايىرىمدىلىق ەكوجۇيەسىنىڭ دامۋىنا ەلەۋلى ۇلەس قوسادى.

قوردىڭ جۇمىسى جالپى جۇرتشىلىقتىڭ سەنىم مانداتىنا نەگىزدەلگەن.

قوردىڭ قايىرىمدىلىق جوبالارى مەن باعدارلامالارى قوعام ءومىرىنىڭ ماڭىزدى سالالارىنا ايتارلىقتاي اسەر ەتەدى جانە كوبىنە ولاردىڭ دامۋىنا تىڭ سەرپىن بەرەدى.

بولات جامىشيەۆتىڭ ايتۋىنشا، قور ازاماتتارىمىزدىڭ دەنساۋلىق ساقتاۋ، ءبىلىم بەرۋ، الەۋمەتتىك قولداۋ، مادەنيەت جانە سپورت سالالارىنداعى نەگىزگى ماسەلەلەرىن شەشۋگە باعىتتالعان جالپى سوماسى 146,5 ميلليارد تەڭگە بولاتىن 40 تان استام قايىرىمدىلىق باعدارلاما مەن جوبانى قارجىلاندىرادى. سونداي- اق توتەنشە جاعدايلار كەزىندە زارداپ شەككەن ازاماتتارعا كومەك كورسەتىلەدى. قوردىڭ باعدارلامالارى اۋىلدىق ەلدى مەكەندەر مەن شاعىن قالالارعا باسىمدىق بەرە وتىرىپ، ەلىمىزدىڭ بارلىق وڭىرلەرىندە جۇزەگە اسىرىلادى.

قوردىڭ ەڭ ءىرى باعدارلاماسى - ومىرگە قاۋىپ توندىرەتىن جانە ورفاندى (سيرەك) اۋرۋمەن اۋىراتىن ناۋقاستار ءۇشىن دارىلىك پرەپاراتتاردى ساتىپ الۋ. 324 قازاقستاندىق (ونىڭ 243 ءى بالالار) ءۇشىن 24,9 ميلليارد تەڭگە كولەمىندە دارىلىك زاتتاردىڭ 36 ءتۇرى، سونداي-اق قازاقستانعا العاش رەت جەتى پرەپارات، ونىڭ ىشىندە الەمدەگى ەڭ قىمبات «زولگەنسما» ءدارىسى ساتىپ الىندى. قوردىڭ قولداۋىنىڭ ناتيجەسىندە ەلىمىزدە تىرەك مەكتەپتەر جۇيەسى (80 مەكتەپ)، اۋىلداعى، اسىرەسە از جابدىقتالعان مەكتەپتەردەگى ءبىلىم دەڭگەيىن ارتتىرۋ ءۇشىن قۇزىرەتتىلىك ورتالىقتارى قۇرىلدى.

قور مۇمكىندىگى شەكتەۋلى، از قامتىلعان جانە اۋىلدان شىققان تالاپكەرلەردىڭ جوعارى ءبىلىم الۋ مۇمكىندىگىن قامتاماسىز ەتەدى. رەسپۋبليكا بويىنشا 2200 دەن استام ستۋدەنت «قازاقستان حالقىنا» قورىنىڭ گرانتتارى مەن ستيپەندياسىنىڭ يەلەنگەن. اۋىلداردا سپورتپەن اينالىساتىن زالداردىڭ تاپشىلىعى مەن قولجەتىمسىزدىگىن ەسكەرىپ، قوردىڭ قولداۋىمەن اۋىل جاستارىنا ارنالعان 24 سپورت زالى اشىلدى. قازىرگى تاڭدا 76 زالدى ىسكە قوسۋ جۇمىستارى جالعاسادى.

ەرەكشە بالالارعا ارنالعان وڭالتۋ ورتالىقتارىن قۇرۋ بويىنشا اۋقىمدى جۇمىس جۇرگىزىلىپ جاتىر. جالپى 4 ەرتە ارالاسۋ ورتالىعى جانە اۋتيزم مەن باسقا دا اقىل- وي اۋىتقۋشىلىعى بار بالالارعا ارنالعان 4 ورتالىق اشىلدى. 13 ورتالىقتى اشۋ جۇمىستارى جۇرگىزىلۋدە.

15- تامىزدان باستاپ قوردىڭ باستاماسىمەن «وڭىرلەرگە ارنالعان قور» اتتى ۇلتتىق قايىرىمدىلىقتىڭ II كونفەرەنتسياسى باستالدى. ەلىمىزدىڭ بارلىق ايماعىندا دوڭگەلەك ۇستەل فورماتىندا وڭىرلەردىڭ قاجەتتىلىكتەرى مەن ەرەكشەلىكتەرىن ەسكەرە وتىرىپ، جۇزەگە اسىرۋعا ۇسىنىلاتىن باستامالار تالقىلانىپ، جوبالار ايقىندالادى. ازىرلەنگەن ۇسىنىستار 2024-جىلى «قازاقستان حالقىنا» قورىنىڭ قىزمەتىندە باسشىلىققا الىنادى.