ۇلى دالا جورىعىندا اقمولا وبلىسىنىڭ نامىسىن قىزدار قورعايدى
اتتار بايگەسىنە ەل وڭىرلەرىنەن 19 كوماندا قاتىسىپ جاتىر. ەرەكشەلىگى سول - اقمولا وبلىسىنىڭ نامىسىن قىزدار قورعايدى، قالعان كوماندالاردىڭ قۇرامىندا تەك ەر ادامدار.
اقمولالىق نازىك جانداردان «ەر ادامدارمەن بىرگە ات جارىستا باق سىناۋ قيىنعا سوقپاي ما؟» دەپ سۇراعان ەدىك.
«بيىلدىققا ءبىرىنشى رەت جارىسقا شىعىپ وتىرمىز. جالپى 5-6 جىلدان بەرى ءتۇرلى ات جارىستارىنا قاتىسىپ كەلەمىز. قىزدارعا ارنالماعان سپورت ءتۇرى دەگەن - ستەرەوتيپ. ات سپورتى ەرلەر نەمەسە قىزدار دەپ بولىنبەيدى. مۇمكىندىك تەڭ. ونىڭ ۇستىنە، جەڭىسكە جەتۋ تەك شاباندوزعا بايلانىستى ەمەس، اتتىڭ دايىندىعى وتە ماڭىزدى. ءبىزدىڭ كوماندادا 5 ادام، ونىڭ 4 ەۋى - قىز، 1 ەر ادام»، - دەدى كوماندا مۇشەسى لاۋرا پۋحباباي.
بۇعان دەيىن «ۇلى دالا جورىعى» باستالىپ، شاباندوزدار استانادان تۇركىستانعا جول تارتقانىن حابارلاعان ەدىك.
ات جارىسى ەلوردا ىرگەسىندەگى قاراجار اۋىلىنان باستالدى. شاباندوزدار 1300 شاقىرىمدى باعىندىرىپ، 19- قىركۇيەكتە تۇركىستاندا مارەگە جەتەدى.
«ۇلى دالا جورىعى» مارافونىنىڭ جالپى جۇلدە قورى - 65 ميلليون تەڭگە. جەڭىمپاز كومانداعا 30 ميلليون تەڭگە، 2-ورىنعا 20 ميلليون تەڭگە، ال 3-ورىنعا 15 ميلليون تەڭگە تابىستالادى.
