كولسايدا ءتيىستى شەكتەۋ ەنگىزبەسەك، ەڭ كورىكتى جەردەن ايىرىلىپ قالامىز - دەپۋتات
«الماتى وبلىسىندا جەتىسۋدىڭ جاۋھارى، ەلىمىزدەگى جەتى كەرەمەتتىڭ بىرىنە بالانعان كولساي كولدەرى بار. ۇلتتىق پارك اۋماعىنداعى ەڭ شۇرايلى جەرلەر كەزىندە جەكەنىڭ قولىنا ءوتىپ كەتكەن. باسىندا بۇل جەرلەر اۋىل شارۋاشىلىعى ماقساتىندا، شابىندىق جانە جايىلىمعا دەپ بەرىلگەن. ەندى كاسىپكەرلەر قوناقۇي، باسسەين، ءدامحانا سالىپ جاتىر. مالىمەت بويىنشا ولاردا قۇرىلىس سالۋعا رۇقسات قاعازدارى جوق. جەر ماقساتسىز پايدالانىلىپ جاتىر. ال ۇلتتىق پارك اۋماعىندا كاپيتالدى قۇرىلىس جۇرگىزۋگە بولمايدى دەگەن ەرەجەنى ەشكىم ەلەمەيدى. قۇزىرلى ورىندار دا ونى تەكسەرۋگە، شارا قولدانۋعا قۇلىقسىز»، - دەدى د. قاسقاراۋوۆ.
رەسمي مالىمەتكە قاراعاندا، كەيىنگى ءبىر جارىم جىلدا «كولساي» كولدەرىنە جارتى ميلليون تۋريست كەلىپتى.
«كولدىڭ اينالاسىندا بوس جەر جوق. اينالانىڭ بارىنە شامامەن ءۇش جۇزدەي كيىز ءۇي مەن تاماقتانۋ شاتىرلارى تىگىلگەن. ەشقايسىسىندا دارەتحانا قويىلماعان. تاۋلى ايماقتا كارىز جۇيەسى بولماعاندىقتان، شايىندى سۋلار جەرگە ءسىڭىپ جاتىر. سەپتيك، اسسەنيزاتور دەگەن اتىمەن جوق. وسىنىڭ سالدارىنان تۇمسا تابيعاتتىڭ ەكولوگياسى بۇزىلىپ جاتىر. ءتۇتىنى بۋداقتاعان كولىكتەر دە كولدىڭ باسىنا دەيىن بارادى. سوندىقتان كولسايدا دا ءتيىستى شەكتەۋ ەنگىزبەسەك، ەندى 5-6 -جىلدا ەلىمىزدەگى ەڭ كورىكتى جەردەن ايىرىلىپ قالامىز. ءبىز سىرتقا كەتكەن اكتيۆتەردى قايتارامىز دەپ جاڭا زاڭ قابىلدادىق. ەل ىشىندە دە كەزىندە قولدى بولعان، ارزان باعاعا ساتىلعان، زاڭسىز وزگەنىڭ يەلىگىنە وتكەن وسىنداي شۇرايلى، ەرەكشە قورعاۋدى قاجەت ەتەتىن جەرلەر بار. ارنايى كوميسسيا قۇرىلىپ، سولاردى كەشەندى تەكسەرۋ كەرەك. وسى رەتتە جالعىز كولساي ەمەس، بارلىق ۇلتتىق پارك اۋماعىنداعى ساتىلعان، ۇزاق جىلعا جالعا بەرىلگەن جەرلەردىڭ زاڭدىلىعىن تەكسەرىپ، مەملەكەت مەنشىگىنە قايتارۋ قاجەت دەپ سانايمىن»، - دەدى دەپۋتات.
