تۇركىستاندا تۇيە ءسۇتى قۇرعاق تابلەتكا بولىپ دايىندالادى
كەزدەسۋ بارىسىندا «Golden Camel» زاۋىتىنىڭ جۇمىس بارىسى تالقىلاندى. تۇيە ءسۇتىن وڭدەۋ ماۋسىمدىق جۇمىس بولعاندىقتان، ينۆەستورلار الدىمەن، دايىندىق جۇمىستارىن باستايدى. ال تەحنيكالىق تەكسەرىستەن وتكەننەن كەيىن ءبىر ايدا زاۋىت ىسكە قوسىلادى.
«تۇركىستانعا كەلگەنىمە ءبىراز جىل بولدى. وسىندا جاڭا ءىس باستاپ، جۇمىس ىستەدىك. سوندىقتان مەن ءۇشىن تۇركىستان ءارقاشان ىستىق. وسى جولى زاۋىتتى قايتادان ىسكە قوسۋ ءۇشىن كەلىپ وتىرمىن. تەحنيكالىق تەكسەرۋ جۇمىستارىنان كەيىن جاقىن ارادا كاسىپورىندى ىسكە قوسۋعا دايىنمىن. تۇيە سۇتىنەن تابلەتكا شىعارۋدى قولعا الامىز. ەشكى ءسۇتى تۇركىستان وبلىسىندا ۇلكەن سۇرانىسقا يە. سوندىقتان وسى باعىتتا دا جۇمىستاردى جانداندىرۋعا دايىنبىز»، - دەدى «Golden Camel group LTD» ءتوراعاسى يان دجي.
تاۋلىگىنە 100 توننا تۇيە مەن بيە ءسۇتىن وڭدەيتىن «Golden Camel group LTD» زاۋىتىنا 7 ميلليارد تەڭگەدەن استام ينۆەستيتسيا قۇيىلعان. مۇندا ۇلتتىق سۋسىندى سوڭعى پروتسەسكە دەيىن وڭدەپ، كوسمەتيكالىق ونىمدەر مەن تۇرمىستىق حيميالىق سۇيىقتىقتار دا شىعارادى. ءونىمنىڭ باسىم بولىگى شەت ەل مەملەكەتتەرىنە ەكسپورتتالادى. جوبانى ىسكە اسىرۋ تۇركىستان مەن كورشى قىزىلوردا، جامبىل وبلىستارىندا تۇيە شارۋاشىلىعىن دامىتۋعا جانە مال باسىن ارتتىرۋعا مۇمكىندىك بەرەدى.
