مينيسترلىك قازىر قولدانىلاتىن حيميوتەراپيا ناۋقاستىڭ ءومىرىن قانشا جىلعا ۇزارتاتىنىن ايتتى
بۇل تۋرالى دەنساۋلىق ساقتاۋ مينيسترلىگى مەديتسينالىق كومەكتى ۇيىمداستىرۋ دەپارتامەنتىنىڭ ديرەكتورى ازامات دۇيسەنوۆ ءمالىم ەتتى، دەپ حابارلايدى قازاقپارات ءتىلشىسى.
«بيىلعى 7 ايدىڭ قورىتىندىسى بويىنشا قازاقستاندا 14175 پاتسيەنت حيميوتەراپيالىق ەم الىپ جاتىر. حيميوتەراپيا ونكولوگيالىق اۋرۋلاردى ەمدەۋدىڭ نەگىزگى ادىستەرىنە جاتادى. ول بەكىتىلگەن دياگنوستيكا جانە ەمدەۋ حاتتامالارىنا سايكەس تاعايىندالادى. نەگىزىنەن كەشەندى ەمدەۋ قۇرامىندا - ىسىك مولشەرىن جانە مەتاستازداردى (كلينيكالىق، كلينيكاعا دەيىنگى) ازايتۋ ماقساتىندا حيرۋرگيالىق ەمدەۋگە دەيىن، رەميسسياعا قول جەتكىزۋ ماقساتىندا جانە قايتالانۋدىڭ الدىن الۋ ماقساتىندا جۇرگىزەدى»، - دەلىنگەن دەپارتامەنت ديرەكتورىنىڭ ءتىلشى ساۋالىنا وراي جولداعان جاۋابىندا.
ۆەدومستۆو دەرەگىنە ساي، زاماناۋي يممۋنوتەراپيانى قولدانۋ اسقىنۋ ساتىسىنداعى ونكولوگيالىق ناۋقاستاردىڭ دەنساۋلىعىن جاقسارتۋعا سەپ بولدى.
«زاماناۋي ماقساتتى جانە يممۋنوتەراپيانى قولدانۋ مەتاستازبەن دامىعان قاتەرلى ىسىكتىڭ كەزەڭدەرى بار ناۋقاستاردىڭ ناتيجەلەرىنىڭ جاقسارعانىن كورسەتەدى. ەگەر بۇرىن وكپەنىڭ قاتەرلى ىسىگى، مەلانوما، ساركوما سياقتى جوعارى اگرەسسيۆتى لوكاليزاتسيالاردا ءبىز 1 جىلدىق ءومىر ءسۇرۋ تۋرالى ايتاتىن بولساق، ءقازىر زاماناۋني ءتيىمدى دارىلىك جانە راديوتەراپيا ادىستەرىن قولدانا وتىرىپ، ءبىز 3 جانە 5 جىلدىق ءومىر ءسۇرۋ ۇزاقتىعى جايلى ايتا الامىز»، - دەپ جازىلعان ۆەدومستۆو ۇسىنعان جاۋاپتا.
قوسا كەتسەك، قازاقستاندا ونكولوگيامەن اۋىراتىن 210 مىڭنان استام ادام ەسەپتە تۇر.
كەيىنگى 2 جىلدا جاستاردان قاتەرلى ىسىك ءجيى انىقتالىپ جاتىر.
جالپى جىل سايىن ونوكولوگياعا شالدىققان ناۋقاستاردى ەمدەۋگە 36 ميلليارد تەڭگە بولىنەدى.
