بەتتى تۇمشالايتىن كيم كيۋگە، كوپ ايەل الۋعا زاڭمەن تىيىم سالىندى

تاشكەنت. قازاقپارات - وزبەكستاننىڭ ولي ءماجىلىسى ەلدىڭ قىلمىستىق كودەكسىنە جانە اكىمشىلىك جاۋاپكەرشىلىك تۋرالى كودەكسكە وزگەرىس پەن تولىقتىرۋ ەنگىزەتىن زاڭ جوباسىن ماقۇلدادى، دەپ حابارلايدى قازاقپارات.

قۇجاتقا سايكەس، وزبەكستاندىقتار كەلەسى قۇقىقبۇزۋشىلىقتار ءۇشىن جاۋاپكەرشىلىككە تارتىلاتىن بولادى:

- ۇلتى، ءناسىلى، ەتنيكالىق جانە ءدىني بەلگىلەرى بويىنشا ازاماتتاردىڭ ۇستەمدىگىن نەمەسە تولىمسىزدىعىن ناسيحاتتاۋ؛

- زاڭ تارتىبىمەن تىركەلمەگەن نەكەنى ءدىني راسىممەن تىركەۋ؛

- ەكى جانە ودان كوپ ايەلمەن بىرگە تۇرۋدى ناسيحاتتاۋ؛

- ايەلدەر مەن ەرلەردىڭ تەڭ قۇقىعىن اشىق تۇردە مويىنداماۋ؛

- ازاماتتىڭ بەت-بەينەسىن تانۋعا كەدەرگى كەلتىرەتىن كيىم-كەشەكتى قوعامدىق ورىندا كيىپ ءجۇرۋ.

ايتا كەتەيىك، مەديتسينالىق دياگنوزى بار ادامدارعا جانە قىزمەتتىك مىندەتىن اتقاراتىن ماماندارعا بەت-بەينەنى تۇمشالايتىن كيىم كيۋگە تىيىم سالىنبايدى. بۇدان بولەك، جول قوزعالىسى قاۋىپسىزدىگىن قامتاماسىز ەتۋ كەزىندە، نەمەسە سپورتتىق جانە وزگە دە مادەني-بۇقارالىق شارالار كەزىندە، زاڭمەن رۇقسات ەتىلگەن وزگە دە جاعدايلاردا قولدانىلاتىن ارنايى باس كيىمدەرگە تىيىم قاراستىرىلماعان.

سونداي-اق، ەندى كوپ ايەل العاندار جازالانادى.

وزبەكستاندا پارلامەنتتىڭ تومەنگى پالاتاسىنىڭ دەپۋتاتتارى ەكى جانە ودان دا كوپ ايەلمەن بىرگە تۇرعان، ايەلدەر مەن ەر ادامداردىڭ تەڭ قۇقىعىن اشىق جوققا شىعارعان، نەكە زاڭدا بەلگىلەنگەن تارتىپپەن تىركەلمەي ءدىني ءراسىم ارقىلى قيىلعان جاعدايدا جاۋاپكەرشىلىك كوزدەيتىن زاڭ قابىلدادى، - دەپ حابارلايدى podrobno.uz.

بۇل ەلدىڭ كونستيتۋتسياسىنىڭ 76-بابىندا وتباسى قوعامنىڭ نەگىزگى بىرلىگى ەكەنى جانە قوعام، مەملەكەتتىڭ قورعاۋىندا بولاتىنى، نەكە وزبەكستان حالقىنىڭ ءداستۇرلى وتباسىلىق قۇندىلىقتارىنا، نەكەگە تۇراتىنداردىڭ ەركىن كەلىسىمى مەن تەڭدىگىنە نەگىزدەلەتىنى ايتىلعان.

باسىلىم مالىمەتىنشە، قابىلدانىپ جاتقان شارالارعا قاراماستان، وزبەكستاندا ءدىني راسىمدەر بويىنشا قۇرىلاتىن نەكە كوبەيىپ بارادى. ءارتۇرلى جارنامالار، ويىن-ساۋىق جانە اناليتيكالىق ماتەريالدار ارقىلى پوليگاميانى جانە ونىڭ ارتىقشىلىقتارىن ناسيحاتتاۋ دا قارقىن الىپ بارا جاتىر. ناتيجەسىندە نەكەسىز تۋعان بالالاردىڭ سانى دا وسكەن.

رەسپۋبليكا بويىنشا 2022 -جىلى جالعىزباستى انالاردىڭ وتىنىشتەرى نەگىزىندە 18955 بالا تىركەلگەن. 2021 -جىلى 19037 بالا تىركەلگەن، ال 2020 -جىلى 16564 كە جەتكەن.

ا ح ا ج ورگاندارىندا نەكە قيماۋ اكە ەكەنىن بەلگىلەۋگە، اليمەنت تاعايىنداۋعا، مۇراعا بايلانىستى ءتۇرلى ماسەلەلەردى تۋعىزادى، ناتيجەسىندە ازاماتتار، اسىرەسە، ايەلدەر ءوز قۇقىعىن قورعاۋدا مەملەكەتكە دەگەن سەنىمىن جوعالتادى.

دەپۋتاتتار كەيىنگى ۋاقىتتا ب ا ق پەن الەۋمەتتىك جەلىلەر ارقىلى گەندەرلىك تەڭسىزدىكتى ناسيحاتتاۋ بايقالعانىن ايتتى.

جاڭا زاڭ جوباسى قىلمىستىق كودەكسكە جانە اكىمشىلىك جاۋاپكەرشىلىك كودەكسىنە ءبىرقاتار وزگەرىس پەن تولىقتىرۋ ەنگىزەدى. ياعني زاڭدا بەلگىلەنگەن تارتىپپەن نەكەسىن تىركەمەي، ءدىني ءراسىم ارقىلى قيعانى ءۇشىن جاۋاپكەرشىلىك بەلگىلەيدى.

سونىمەن قاتار، زاڭ جوباسىندا ەكى نەمەسە ودان دا كوپ ايەلمەن بىرگە تۇرۋعا جاردەمدەسۋ، سونداي-اق، ايەلدەر مەن ەرلەردىڭ تەڭ قۇقىعىن اشىق جوققا شىعارۋ ءۇشىن اكىمشىلىك جاۋاپكەرشىلىك قاراستىرىلعان.

ەندى زاڭدى سەناتورلار ماقۇلداپ، سودان كەيىن پرەزيدەنت قول قويۋى كەرەك. وسىدان كەيىن عانا ول كۇشىنە ەنەدى.