لەنيندى قايتارىڭدار!: التاي قالاسىندا بۇزىلىپ قالعان ەسكەرتكىش ماڭىنا جازۋ جازعان ادام ىزدەستىرىلۋدە

وسكەمەن. قازاقپارات - شىعىس قازاقستان وبلىسى التاي قالاسىندا لەنين ەسكەرتكىشىنىڭ ماڭىنا جازۋ جازىپ كەتكەن ادامدى پوليتسيا ىزدەستىرۋدە، دەپ حابارلايدى قازاقپارات ءتىلشىسى.

تامىز ايىنىڭ ورتاسىندا التاي قالاسىندا جوندەلىپ جاتقان لەنين ەسكەرتكىشى قيراپ قالعان بولاتىن. وسىعان بايلانىستى پوليتسيانىڭ تەرگەۋ جۇرگىزىپ جاتقانى حابارلانعان.

كەشەلى بەرى الەۋمەتتىك جەلىدە بەلگىسىز بىرەۋدىڭ لەنين ەسكەرتكىشى تۇرعان قورشاۋدىڭ سىرتىنا «لەنيندى قايتارىڭدار!» دەپ جازعان جازۋىنىڭ فوتوسۋرەتى تارادى.

وسى رەتتە، ش ق و پوليتسيا دەپارتامەنتى ۆاندالدىڭ ىزدەستىرىلىپ جاتقانىن حابارلادى.

«4-قىركۇيەك كۇنى بەلگىسىز ادامنىڭ لەنين ەسكەرتكىشىن قالپىنا كەلتىرۋ جۇمىستارى جۇرگىزىلىپ جاتقان قورشاۋعا قىزىل بوياۋمەن جازبا تۇسىرگەنى تۋرالى حابار كەلىپ ءتۇستى. قازىرگى ۋاقىتتا ونىڭ كىم ەكەنىن انىقتاۋ شارالارى جۇرگىزىلۋدە. ق ر ا ق ب ت ك-نىڭ 434-بابى (ۇساق بۇزاقىلىق ءۇشىن، ياعني قوعامدىق ورىنداردا بالاعات سوزدەر ايتقانى، جەكە تۇلعالاردى قورلاپ قورلاعانى، عيماراتتاردى، وزگە دە قۇرىلىستاردى، تۇرعىن ءۇي-جايلاردى، ورتاق پايدالانۋ ورىندارىن، كولىكتەگى جانە وزگە دە قوعامدىق ورىندارداعى مۇلىكتى قورلاعانى جانە باسقالاردى قۇرمەتتەمەۋدى بىلدىرەتىن باسقا دا وسىنداي ارەكەتتەر ءۇشىن، قوعامدىق ءتارتىپتى جانە جەكە تۇلعالاردىڭ تىنىشتىعىن بۇزاتىن ادامدار) بويىنشا اكىمشىلىك ءىس قوزعالدى»، - دەلىنگەن اقپاراتتا.

اتالعان باپ بويىنشا كىنالى ادام 20 ا ە ك مولشەرىندە (69 مىڭ تەڭگە) ايىپپۇل تولەپ نەمەسە بەستەن ون بەس تاۋلىككە دەيىنگى مەرزىمگە اكىمشىلىك قاماققا الىنۋى مۇمكىن.