ءورت سالدارىنان بولعان ماتەريالدىق شىعىندى كىم وتەيدى

استانا. قازاقپارات - استانا قالاسى ت ج د مەملەكەتتىك ءورت باقىلاۋ باسقارماسى باستىعى مىندەتىن اتقارۋشى اجار رۇستەموۆا ءورت كەزىندەگى ماتەريالدىق شىعىن قالاي وتەلەتىنىن ءتۇسىندىردى، دەپ حابارلايدى قازاقپارات ءتىلشىسى.

استانا قالاسىنىڭ كوممۋنيكاتسيالار قىزمەتىندەگى بريفينگتە «ءورت كەزىندە اسا ءىرى ماتەريالدىق شىعىن بولسا، ونى كىم وتەيدى؟» دەگەن سۇراق قويىلدى.

سپيكەردىڭ ايتۋىنشا، ازاماتتىق قورعاۋ تۋرالى زاڭدا ماتەريالدىق شىعىندى وتەۋ مەن قالپىنا كەلتىرۋ تارتىپتەرى جازىلعان.

«زاڭدا تەحنوگەندىك وقيعالار، توتەنشە جاعداي سالدارىنان ماتەريالدىق زالال كەلگەن جاعدايدا ونىڭ ءۇشىنشى تۇلعالاردىڭ، زالال كەلتىرگەندەردىڭ ەسەبىنەن وتەلەتىنى جازىلعان. بەلگىلى ءبىر ەرەجە بار. بۇل ەرىكتى نەگىزدە نەمەسە سوت تارتىبىمەن بەلگىلەنەدى. ياعني، كىناسى دالەلدەنسە، سوت ءۇشىنشى تۇلعالارعا كەلتىرىلگەن زالالدى قالپىنا كەلتىرۋدى مىندەتتەيدى. ەرىكتى ساقتاندىرۋ ۇعىمى دا بار. ءبىز وعان دا باسا ءمان بەرەمىز. ساقتاندىرۋ جاعدايى تۋىنداعان جاعدايدا، حالىق كەلگەن شىعىندارىن قالپىنا كەلتىرە الادى»، - دەپ جاۋاپ بەردى ا. رۇستەموۆا.

ونىڭ ايتۋىنشا، تۇرعىن ۇيلەردەگى ءورت ماسەلەسى وزەكتى بولىپ قالا بەرەدى، دەگەنمەن بيىل ستاتيستيكادا ايتارلىقتاي وڭ ءۇردىس بايقالادى: وتكەن جىلمەن سالىستىرعاندا ورتتەر سانى 17-20 پايىزعا تومەندەۋى بايقالادى.

بۇعان دەيىن اجار رۇستەموۆا استاناداعى ءزاۋلىم عيماراتتاردىڭ ءورت قاۋىپسىزدىگى تەكسەرىلىپ جاتقانىن ايتقان ەدى.