پرەزيدەنت وتاندىق قورعانىس ونەركاسىبى كەشەنىنىڭ الەۋەتىمەن تانىستى

استانا. قازاقپارات - وقۋ-جاتتىعۋ جيىنى بارىسىندا مەملەكەت باسشىسى - قارۋلى كۇشتەردىڭ جوعارعى باس قولباسشىسى قاسىم-جومارت توقايەۆقا وتاندىق قورعانىس ونەركاسىبى كەشەنى كاسىپورىندارىنىڭ قارۋ-جاراق پەن اسكەري تەحنيكا شىعارۋ جانە جوندەۋ مۇمكىندىكتەرى تانىستىرىلدى.

بۇل تۋرالى قازاقپارات اقوردانىڭ باسپا ءسوز قىزمەتىنە سىلتەمە جاساپ حابارلايدى.

باسپا ءسوز قىزمەتىنىڭ مالىمەتتەرىنە قاراعاندا، دالادا ۇيىمداستىرىلعان ارنايى الاڭقايدا ورتالىق ازيا ايماعىنداعى بروندى تەحنيكالاردى جوندەۋگە ماماندانعان جالعىز «سەمەي ينجينيرينگ» (سەمەي) زاۋىتى بروندى جوندەۋ-ەۆاكۋاتسيالىق ترانسپورتتاۋ ماشيناسىن پايدالانا وتىرىپ، ۇرىستا زاقىمدانعان تەحنيكانى قايتا قالپىنا كەلتىرۋ بارىسىن كورسەتتى.

«Navyco» كومپانياسىنىڭ وكىلى (استانا) بروندى تەحنيكانى قالپىنا كەلتىرۋگە ارنالعان اگرەگاتتاردىڭ دالا جاعدايىندا قالاي اۋىستىرىلاتىنى، ال «كاماز ينجينيرينگ» (كوكشەتاۋ) جانە «405№ اۆياجوندەۋ زاۋىتى» (الماتى) كاسىپورىندارى اسكەري تەحنيكانى قۇراستىرۋ، قالپىنا كەلتىرۋ مۇمكىندىكتەرى جونىندە مالىمەت بەردى.

كورمەگە قازاقستان مەن تۇركيانىڭ «قازاقستان Aselsan ينجينيرينگ» (استانا) بىرلەسكەن كاسىپورنى، «ۆوستوك پوليمەر سناب» ج ش س (وسكەمەن)، «Universal-Build» ج ش س (الماتى)، «energy General» ج ك (الماتى) جانە باسقا دا كاسىپورىنداردىڭ ونىمدەرى قويىلدى.

پرەزيدەنتكە تۇركيالىق «otakar» كومپانياسى شىعاراتىن ARMA بروندى ماشيناسىنىڭ سۋ كەدەرگىلەرىنەن ءوتۋ مۇمكىندىكتەرى تانىستىرىلدى.

كورمەنى ارالاپ كورگەن مەملەكەت باسشىسى وتاندىق قورعانىس ونەركاسىبىنىڭ الەۋەتىن ارتتىرۋ ماڭىزدى ەكەنىن اتاپ ءوتتى.