قازاقستاندا ونكولوگيالىق دەرتتەر كوبىنە ەكىنشى ساتىسىندا انىقتالادى
بۇل تۋرالى دەنساۋلىق ساقتاۋ مينيسترلىگى مەديتسينالىق كومەكتى ۇيىمداستىرۋ دەپارتامەنتىنىڭ ديرەكتورى ازامات دۇيسەنوۆتىڭ ءتىلشى ساۋالىنا بەرگەن جاۋابىندا ايتىلعان، دەپ حابارلايدى قازاقپارات ءتىلشىسى.
«حيرۋرگيالىق ارالاسۋ قاتەرلى ىسىكتەردى ەمدەۋدىڭ نەگىزگى ادىستەرىنىڭ ءبىرى سانالادى جانە ءىس جۇزىندە بارلىق ونكولوگيالىق ناۋقاستارعا ءتۇرلى كولەمدە جانە ساۋلەلىك، حيميوتەراپيامەن ءارتۇرلى كومبيناتسيادا جاسالادى. تەك حيرۋرگيالىق ەمدەۋ كوبىنە ونكولوگيالىق اۋرۋدىڭ ەرتە ساتىسىندا جاسالادى. 2021 -جىلى تەك حيرۋرگيالىق ەم العان پاتسيەنتتەردىڭ سانى 5306 ادامدى قۇرادى. ونىڭ ىشىندە العاش وسىنداي دەرت انىقتالعان ناۋقاستاردىڭ ۇلەسى - 15,1 پايىز.
2022 -جىلى 4965 ادامعا وتا جاسالدى، وندا العاش انىقتالعانداردىڭ سانى - 13 پايىز. ال 2023 -جىلدىڭ 6 ايىنداعى كەزەڭدە تەك حيرۋرگيالىق ەم العان پاتسيەنتتەر سانى 2577 (العاش انىقتالعانداردىڭ ۇلەسى %12,9) قۇرادى»، - دەپ جاۋاپ بەرگەن ازامات دۇيسەنوۆ.
ونىڭ دەرەگىنشە، قازاقستاندا ونكولوگيالىق دەرتتەر كوبىنە ەكىنشى ساتىدا انىقتالادى.
«قازاقستاندا كوبىنەسە قاتەرلى ىسىكتەر قاتەرلى پروتسەستىڭ II ساتىسىندا دياگنوز قويىلادى. مۇندايلاردىڭ ۇلەسى 2021 -جىلى -%31,9، 2022 -جىلى %30,3 قۇرادى»، - دەلىنگەن جاۋاپتا.
